OAV: Mahmud Abbos Turkmanistonga rasmiy tashrif buyuradi

Falastin rahbari Mahmud Abbos 13-15 noyabr kunlari rasmiy tashrif bilan Ashxobodga keladi, deya xabar qilmoqda Turkimaniston mahalliy OAV. 

Falastin yetakchisining tashrifi Turkmaniston hukumati majlisida muhokama qilingan. 

Turkmaniston tashqi ishlar vaziri Rashid Meredovning so‘zlariga ko‘ra, ikki davlat o‘rtasidagi diplomatik munosabatlar 1992 yil aprelida o‘rnatilgan, bugungi kunda turkman-falastin hamkorligining me'yoriy-huquqiy asosi 7ta xalqaro kelishuvdan iborat. 

Vazirning ta'kidlashicha, shu yilning may oyida Turkmaniston TIV delegatsiyasi amaliy tashrif bilan Ramallohga borgan. Bu yerda ikki tomonlama muzokaralar o‘tkazilgan va 2016-2017 yillarga mo‘ljallangan hamkorlik dasturlari imzolangan. 
Bundan tashqari, hozirda, Ashxobodda Falastin elchixonasini ochish ishlari olib borilmoqda. 

Oliy darajadagi Ashxobod uchrashuvlari so‘nggida ikki davlat o‘rtasidagi hamkorlikni mustahkamlash va kenngaytirishga qaratilgan bitimlar imzolanishi kutilmoqda.