5 yil avval yo‘qolgan kanadalik Amazonka junglilaridan topildi

39 yoshli Anton Pilipa ismli kanadalik 2012 yilda Vankuverdagi uyidan yo‘qolib qolgandan keyin Amazonka junglilaridan sog‘-omon topilgan. U bu vaqt ichida 2 ta qit'ani kesib o‘tib, AQSh, Meksika, Gvatemala, Kosta-Rika, Panama, Kolumbiya, Venesuela, Argentina va Braziliyada bo‘lishga ulgurgan.

Erkakning oilasi ular bilan Braziliya politsiyasi bog‘lanmaguncha, uning 2016 yil dekabrigacha qayerdaligi haqida hech qanday axborotga ega bo‘lmagan. Bunga esa Antonning ayol politsiyachi bilan tanishib qolgani qisman ko‘mak bergan. Antonni o‘z qaramog‘iga olgan braziliyalik ayol politsiyachining aytishicha, Antonning yonida na puli, na hujjatlari bo‘lgan. Ayol uni shifoxonaga olib borgan, biroq Anton u yerdan qochib ketgan. Keyinroq kanadalik ushlanib, uning shaxsi o‘rnatilgan.   

Braziliya hukumati Antonning oilasi bilan bog‘langan. Antonning akasi Stefanning aytishicha, u anchada vaqtdan beri shizofreniya kasalligidan aziyat chekib kelgan. Antonning miyasiga Buenos-Ayresdagi Milliy kutubxonaga borish g‘oyasi o‘rnashib qolgan.