OTB O‘zbekistonga gidroelektrostansiyalar qurish uchun kredit ajratadi

Osiyo Taraqqiyot Banki (OTB) O‘zbekiston hukumatiga energetika balansini diversifikatsiya qilish imkoniyatini beradigan umumiy quvvati 25 megavatt bo‘lgan gidroelektrostansiyalar qurish uchun 60 million dollar miqdorida kredit ajratilishini ma'qulladi.

"GES qurishda OTBning hamkorligi O‘zbekistonning yanada sof va barqaror energetik kelajakni ta'minlashiga yordam beradi", dedi OTBning Markaziy va G‘arbiy Osiyodagi energiya bo‘yicha mutaxassisi Seng Dak Kim. 

Loyiha doirasida umumiy quvvati 25 MVt bo‘lgan uchta gidroelektrostansiya va umumiy quvvati 1 MVt bo‘lgan uchta mini / mikro GES quriladi. Mini/mikro gidroelektrostansiyalar suv resurslaridan, jumladan to‘g‘on yoki sug‘orish kanallaridan olinadigan ikkilamchi suvdan samarali foydalanishni ta'minlaydi hamda qishloq va olis tumanlarda muqobil elektr energiyasi manbalariga aylanishi mumkin.  

Mamlakat gidroenergetikasini 2030 yilga kelib 1600 MVtgacha yetkazishga qaratilgan 2,6 milliard dollarlik davlat investitsiya dasturining amalga oshirilishini nazorat qilish bo‘yicha markaziy idora bo‘lgan "O‘zbekgidroenergo" aksiyadorlik jamiyati loyihani ijro etuvchi agentlik hisoblanadi. kiradi. Shuningdek, OTB butun loyiha davomida "O‘zbekgidroenergo"ning institutsional salohiyati va korporativ boshqaruvini yaxshilashga yordam beradi.

Umumiy qiymati 75,3 million dollarni tashkil etadigan loyiha 2023 yil oxiriga qadar yakunlanishi kutilmoqda.