YUNISEF: Ukrainada tobora ko‘proq bolalar urush qurboniga aylanmoqda

BMT ma’lumotlariga ko‘ra, 2025 yil bahorida Ukrainadagi harbiy harakatlarda 222 nafar bola va o‘smir halok bo‘lgan. Avvalgi uch oyda mamlakatda urush qurbonlari bo‘lgan voyaga yetmaganlar uch baravar kam bo‘lgan.

Foto: Henning Kaiser/dpa/picture alliance

Ukrainada 2025 yilning mart-may oylaridagi jangovar harakatlar natijasida kamida 222 nafar bola va o‘smir halok bo‘lgan yoki yaralangan. Undan avvalgi uch oyda mamlakatda 73 nafar voyaga yetmagan urush qurboni sifatida qayd etilgan, ya’ni uch baravar kam.

YUNISEF hisobotiga ko‘ra, birgina aprel oyida Ukrainada 97 nafar bola va o‘smir halok bo‘lgan. Bu BMT tomonidan tasdiqlangan 2022 yil iyunidan beri bir oy ichida eng ko‘p bolalar orasidagi qurbonlar soni.

YUNISEFning Yevropa va Markaziy Osiyo bo‘yicha mintaqaviy direktori Rejina De Dominicis shunday dedi: «Urush Ukrainadagi ukrainalik bolalarga hech qanday muhlat bermayapti. Intensiv hujumlar nafaqat odamlarning hayotiga zomin bo‘lish, balki bolalikning barcha jabhalarini yo‘q qilishda davom etmoqda». De Dominicisning ta’kidlashicha, shifoxonalar, maktablar, suv va elektr tarmoqlari, shuningdek, bolalar maydonchalariga qilingan hujumlar bu borada ayniqsa halokatli.

YUNISEF, shuningdek, bolalar va o‘smirlarning harbiy obektlarga hujum, diversiya yoki ma’lumot to‘plash kabi urush bilan bog‘liq vazifalarni bajarish uchun onlayn tarzda yollanishi holatlaridan ayniqsa xavotirda. Bunday harakatlar natijasida kamida ikki o‘g‘il bola halok bo‘ldi, yana biri yaralandi, deya xabar berdi BMTning Ukrainadagi inson huquqlari bo‘yicha monitoringi missiyasi.