Toyota AQShdagi yarim milliondan ortiq mashinalarini chaqirib oladigan bo‘ldi

Toyota AQShdagi 591 377 ta avtomobillarda asboblar paneli displeyidagi muhim ma’lumotlarni ko‘rsatmaydigan muammoni aniqlagan. Buning oqibatida yo‘l-transport hodisalari sodir bo‘lishi, odamlar jarohat olishi mumkin. Muammo xavf darajasini oshiradi, dedi kompaniya 18 sentabr kungi bayonotida.

Qaytarib olish Venza, Highlander, Lexus, Tacoma va GR Corolla kabi bir nechta modellarni qamrab oladi.

Kompaniyaning qo‘shimcha qilishicha, avtomobilni ishga tushirish vaqtida asboblar panelidagi dasturiy xatolik tufayli mashinaning tezligi, tormoz tizimi va shinalar bosimi haqida ogohlantirish chiroqlari ko‘rinmay qolish xavfi bor.

Eslatib o‘tamiz, Toyota AQShda o‘z ishlab chiqarish zavodlariga ega hamda kompaniya bergan statistikaga ko‘ra, 2024 yilda bu davlatda Toyota 2 332 623 dona avtomobil sotgan. Bu 2023 yilga qaraganda 3.7 foizga, kunlik savdo taqqoslansa 3,1 foizga ko‘p degani.

“Bizning ko‘p yo‘nalishli quvvat uzatish yondashuvimiz mijozlarimizning turmush tarzi va budjetlariga mos kelmoqda”, - deydi Toyota’ning Shimoliy Amerika mintaqasi uchun zavodning ijrochi vitse-prezidenti Jyek Hollis.

Kompaniya bu mintaqada 65 yildan beri mahsulot sotib keladi va yuqori obro‘ga ega.