WSJ: Rubio AQSh delegatsiyasi rahbari sifatida Uitkoffni almashtiradi

Budapeshtda bo‘lib o‘tadigan Putin-Tramp sammiti oldidan Rossiya va AQSh Alyaskadagi sammitdan ko‘ra ko‘proq uchrashuvlar o‘tkazadi, deb yozadi WSJ. Gazetaning yozishicha, bu gal AQSh delegatsiyasiga davlat kotibi Rubio boshchilik qiladi.

Foto: AP

Qo‘shma Shtatlar Rossiya bilan Budapesht sammiti oldidan ikki davlat prezidentlarining avgust oyi o‘rtalarida Alyaskada bo‘lib o‘tgan birinchi uchrashuvidan ko‘proq uchrashuvlar o‘tkazishni rejalashtirmoqda, deb xabar berdi The Wall Street Journal (WSJ) 18 oktyabr, shanbaga o‘tar kechasi Oq uydagi manbalarga tayanib. Manbalarga ko‘ra, AQSh delegatsiyasiga AQSh prezidenti maxsus vakili Stiv Uitkoff o‘rniga davlat kotibi Marko Rubio boshchilik qiladi, bu ham Ukraina, ham Yevropa rasmiylari tomonidan olqishlangan.

«Parda ortida [AQSh prezidenti Donald] Trampning jamoasi ikki yetakchi o‘rtasidagi muzokaralarni u Rossiya prezidenti Vladimir Putin bilan avgustdagi sammitida qo‘llaganidan ko‘ra kuchliroq diplomatik ta’sirlar bilan mustahkamlash ustida ishlamoqda», deb yozadi WSJ. Jurnalistlarning fikricha, Trampning Putin bilan navbatdagi sammitni tashkil etish haqidagi qarori «xavfsiz emas», chunki Oq uy va Kreml rahbarlarining avvalgi uchrashuvi katta muvaffaqiyatlarsiz yakunlangan va «asosan Moskvaning g‘alabasi sifatida ko‘rilgan».

16 oktyabr oqshomida, Ukraina prezidenti Volodimir Zelenskiyning AQShga tashrifidan bir kun oldin Tramp Putin bilan ikki soatlik telefon muloqoti o‘tkazdi. Suhbatdan so‘ng u Budapeshtda Rossiya prezidenti bilan uchrashishga kelishib olganini ma’lum qildi. Ularning sammiti Amerika va Rossiya delegatsiyalarining uchrashuvida tayyorlanishi rejalashtirilgan.

The Wall Street Journal nashrining yozishicha, Oq uy Trampga Rossiyaga qarshi sanksiyalar qo‘llash bo‘yicha kengroq vakolatlar beruvchi qonun loyihasini ilgari surish uchun «AQSh Vakillar palatasi a’zolari bilan yaqindan ishlamoqda». WSJ manbalaridan biri aniqlik kiritishicha, sanksiyalar to‘g‘risidagi qonun loyihasi keyingi 30 kun ichida ovozga qo‘yilishi mumkin. Donald Trampning o‘zi Oq uyda Zelenskiy bilan uchrashuvi chog‘ida Putin bilan sammitga tayyorgarlik AQShning Rossiyaga qarshi sanksiyalarini joriy qilish uchun «yaxshi vaqt» emasligini ta’kidladi.

«Rossiya birinchi marta status-kvoning ayrim hududiy chegaralarini saqlab qolishga tayyorligini ma’lum qildi va 2024 yil iyun oyida Ukrainaning to‘rtta sharqiy mintaqasi (Luxansk, Donetsk, Xerson va Zaporijjya) ustidan to‘liq nazorat o‘rnatish to‘g‘risidagi o‘z talablarining bir qismidan voz kechdi», deyiladi WSJ materialida.