AQSh va Hindiston mudofaa sohasida 10 yillik shartnomani imzoladi

AQSh va Hindiston mudofaa vazirlari Pit Hegset va Rajnatx Singx yirik mudofaa shartnomasini tuzdi. 31 oktabr kuni Malayziyada bo‘lib o‘tgan Janubi-Sharqiy Osiyo davlatlari assotsiatsiyasi (ASeAN) sammiti doirasida tomonlar AQSh va Hindiston o‘rtasida 10 yilga mo‘ljallangan mudofaa hamkorligini mustahkamlash to‘g‘risidagi hadli bitimni imzoladi.

Hegset so‘zlariga ko‘ra, shartnoma «mintaqaviy barqarorlik va tiyib turishning poydevori» bo‘lib, ikki davlat o‘rtasidagi muvofiqlashtirish, razvedka ma’lumotlari almashinuvi va texnologik hamkorlikni chuqurlashtirishga yordam beradi.

«Bu qurolli kuchlarimiz uchun muhim qadam, yanada chuqur va mazmunli hamkorlik uchun yo‘l xaritasi», dedi Pentagon rahbari.

O‘z navbatida, hindistonlik vazir amerikalik hamkasbi bilan «samarali uchrashuvni» yuqori baholadi. Uning ta’kidlashicha, kelishuv Hindiston va AQSh o‘rtasidagi mudofaa sohasidagi munosabatlarda «yangi davrni boshlab beradi». Imzolangan hujjat ikki mamlakatning «o‘sib borayotgan strategik yaqinlashuvini» aks ettiradi va Hind-Tinch okeani mintaqasi uchun hal qiluvchi ahamiyatga ega, dedi Singx.

Mudofaa shartnomasi Hindiston va AQSh o‘rtasidagi munosabatlar keskinlashgan davrga to‘g‘ri kelmoqda.

Avvalroq, AQSh prezidenti Donald Tramp Nyu-Dehlining Rossiya nefti importini to‘xtatishdan bosh tortishi fonida Hindiston eksportining bir qismiga 50 foizlik boj joriy qilgan edi. Shundan so‘ng Hindiston Amerika harbiy texnikasini sotib olishni to‘xtatdi.

AQSh Rossiya neft sektoriga nisbatan yangi bojlari joriy etilgandan so‘ng, Hindiston Rossiyadan neft sotib olishni to‘xtatgani haqida xabarlar paydo bo‘ldi. Trampning aytishicha, buni unga Hindiston bosh vaziri Narendra Modi aytgan.