Fransiyada 15 yoshgacha bo‘lgan shaxslarga ijtimoiy tarmoqlar taqiqlanishi mumkin

Fransiya kelasi yilning 1 sentabridan boshlab 15 yoshgacha bo‘lgan o‘smirlarga ijtimoiy tarmoqlardan foydalanishni taqiqlamoqchi. Bu haqda tegishli qonun loyihasi matniga tayanib, Franceinfo xabar berdi. Loyihaning parlamentdagi muhokamasi yanvar oyida bo‘lib o‘tadi.

Portal ma’lumotlariga ko‘ra, qonun loyihasida ikkita taklif mavjud, birinchisi - 15 yoshgacha bo‘lgan shaxslarga ijtimoiy tarmoqlarni taqiqlash, ikkinchisi - o‘rta maktablarda mobil telefonlardan foydalanishni taqiqlash. Nashr manbalarining aniqlik kiritishicha, hujjat «Yevropa qonunchiligiga muvofiq» tuzilgan.

«Ko‘p sonli tadqiqotlar va hisobotlar o‘smirlar tomonidan raqamli ekranlardan haddan tashqari foydalanish bilan bog‘liq turli xavflarni tasdiqlaydi», deyiladi hujjatda. Hukumat bunday xavflar qatoriga «nomaqbul kontent ta’siri», «bulling va uyquning buzilishi» kabilarni kiritdi.

Ta’kidlanishicha, Fransiyada 2018 yildan boshlab maktabgacha ta’limdan o‘rta darajadagi sinflargacha mobil telefonlardan foydalanish taqiqlangan, biroq «ba’zida bu me’yorga rioya etilishini ta’minlash qiyin bo‘lmoqda».

Dekabr oyi boshida Avstraliya dunyoda birinchi bo‘lib 16 yoshgacha bo‘lgan shaxslarga ijtimoiy tarmoqlardan foydalanishni taqiqladi. Asosiy platformalar, jumladan Facebook, Instagram va TikTok voyaga yetmaganlarning akkauntlarini o‘chirib tashlashi shart. Ijro etmaganlik uchun yirik miqdorda jarimalar nazarda tutilgan.