Bloomberg: AQSh nomidan Venesuelani boshqarishni Rubio o‘z zimmasiga oladi

Venesuela rahbari Nikolas Maduro ag‘darilganidan keyin mamlakatni AQSh tomonidan boshqarishda hal qiluvchi ma’muriy rolni AQSh Davlat departamenti rahbari Marko Rubio o‘z zimmasiga oladi. Bu haqda Bloomberg agentligi yakshanba, 4 yanvar kuni AQShdagi nomi aytilmagan manbaga tayanib xabar berdi. Davlat kotibi — kubalik muhojirlar oilasida Mayamida tug‘ilgan, asli kelib chiqishi kubalik bo‘lgan amerikalik.

Bloomberg aniqlashtirishicha, AQSh prezidenti Donald Tramp Venesuelaning neft sohasiga katta e’tibor qaratayotganini aytgan, Amerika neft kompaniyalari esa mamlakatda neft infratuzilmasini tiklash uchun “milliardlab dollar” sarflaydi. Nomi aytilmagan yuqori lavozimli amerikalik amaldor The Wall Street Journal gazetasiga ma’lum qilishicha, hozirda Tramp jamoasi — davlat kotibi Marko Rubio, ichki xavfsizlik bo‘yicha maslahatchi Stiven Miller va mudofaa vaziri Pit Hegset tarkibida Venesuelani boshqarish tuzilmasi ustida ishlamoqda.

Venesuela Oliy sudi mamlakatning sobiq ijrochi vitse-prezidenti Delsi Rodrigesni vaqtincha prezident etib tayinladi. Sudya so‘zlariga ko‘ra, “qaror 2026 yil 3 yanvar kuni Venesuela Bolivar Respublikasiga qarshi sodir etilgan xorijiy harbiy tajovuz munosabati bilan qabul qilingan, bu tajovuzning maqsadi konstitutsiyaviy prezident Nikolas Maduro Morosni o‘g‘irlab ketish bo‘lgan”. Bayonotda ta’kidlanishicha, yangi tayinlov fors-major sharoitida davlat tizimlarining ishi “ma’muriy uzluksizligi”ni va “millat mudofaasi”ni ta’minlash uchun zarur.

Dpa agentligi xabar berishicha, Rodriges davlat rahbari lavozimini egallashga tayyorligini bildirgan. Ammo tegishli bayonotdan keyin u Maduroga sodiqligini namoyon etgan. “Bu mamlakatda faqat bitta prezident bor, uning ismi — Nikolas Maduro Moros”, — degan Rodriges vazirlar va harbiylar qurshovida Milliy mudofaa kengashi majlisida.

Bu tayinlov haqida Donald Tramp shunday dedi: agar Delsi Rodriges “biz istagan ishni qilsa”, Venesuelada AQSh harbiy ishtiroki kerak bo‘lmaydi. Oq uy rahbari matbuot anjumanida AQSh Venesuelani hokimiyatning “xavfsiz” va “to‘g‘ri” o‘tish jarayoniga qadar boshqarishini bildirdi. Shu bilan birga, u Venesuela muxolifati yetakchilaridan biri, Tinchlik bo‘yicha Nobel mukofoti sohibi Mariya Korina Machadoning kelajakdagi boshqaruvda ishtirok etishi bo‘yicha nomzodini rad etdi.

AQSh armiyasi 2026 yil 3 yanvarga o‘tar kechasi Venesuela poytaxti Karakasga zarbalar bergan. AQSh prezidenti Donald Tramp aytishicha, Venesuela rahbari Nikolas Maduro va uning rafiqasi Siliya Flores “Delta” maxsus bo‘linmasi tomonidan qo‘lga olingan va mamlakatdan olib chiqib ketilgan: avval AQSh Dengiz kuchlarining Guantanamodagi bazasiga, keyin esa Nyu-Yorkka yetkazilgan.

AQSh hukumati Nikolas Maduroga “narkoterrorizm”, qurol saqlash va venesuelalik diplomatik pasportlarni sotish ayblovlari bo‘yicha rasmiy ayblov qo‘ygan. 4 yanvar kuni ayblov xulosasi AQSh Adliya vazirligi saytida e’lon qilingan. Xususan, Venesuela rahbari AQShda ilgari terroristik tashkilot deb e’lon qilingan Cartel de los Soles jinoiy guruhini boshqarganlikda, shuningdek rafiqasi, o‘g‘li va yaqin atrofidagi hamkorlari bilan birga kokain ishlab chiqarish va tashish bo‘yicha kolumbiyalik guruhlar bilan til biriktirganlikda ayblanmoqda.