Маданият вазирлиги: Самарқандда шаҳарнинг тарихий қисми тикланади

Бу борада юртимиз ва чет эл етакчи мутахассислари биргаликда иш олиб боради, дея маълум қилди Ўзбекистон маданият вазирлиги. Бу ҳақда “Зарафшон” нашри ёзмоқда.

Маданият вазири ўринбосари Камола Акилованинг журналистлар билан ўтказилган учрашувда маълум қилишича, Самарқандда сўнгги икки-уч йил ичида ўзбошимчалик авж олган: ҳудудлар сотиб юбораверилган, эски участкалар бузилган.

Вазир ўринбосарининг сўзларига кўра, шаҳарнинг тарихий қисмини тиклашда ҳар бир уй, ҳар бир кўча эътиборга олинади.

Бу ҳудудда икки қаватдан юқори бино қуриш тақиқланади. Уй таъмирланаётган бўлса-да, реставрация талабларига амал қилиниши лозим, дея таъкидлади К.Акилова.

Ўзбекистон ўз шаҳарларини ЮНЕСКОнинг Бутун жаҳон мероси рўйхатига киритган экан ва тегишли конвенцияни ратификация қилган экан, ундаги қоидаларга риоя қилиши керак, дея хулоса қилди вазир ўринбосари.