Москвада янги трамвай синовдан ўтказилади. У инсон аралашувисиз ҳаракатланади

Cognitive Technologies ва «ПК Транспортние системи» компаниялари Россиядаги биринчи ҳайдовчисиз трамвайни ишлаб чиқди. Бу ҳақда «Ведомости» хабар бермоқда. Унинг тест синовлари яқин вақт ичида Москвада бўлиб ўтади.

Янги трамвай 17-йўналишида (Останкино - Медведково) синовдан ўтказилади. Синов вақтида ҳайдовчи кабинада бўлади.

Ҳайдовчисиз трамвайлардан тижорат мақсадида фойдаланиш 2021-2022 йилларда бошланиши кутилмоқда.

«Ведомости»нинг ёзишича, биринчи босқичда ҳайдовчи трамвай ҳаракатини назорат қилади, тизим икки ҳолатда унинг ҳаракатларига аралаша олади: ҳайдовчи йўлнинг хавфли қисмида ёки ёмон об-ҳаво шароитида жуда тез ҳаракат қилса, тезликни пасайтиради, ва йўлда бегона объект аниқланса, у автоматик тарзда тормоз олади.