Қишлоқ хўжалиги техникаси ва технологияларини сертификатлаш ва синаш маркази ислоҳ қилинади

Вазирлар Маҳкамасининг “Ўзбекистон Республикаси Қишлоқ хўжалиги вазирлиги ҳузуридаги Қишлоқ хўжалиги техникаси ва технологияларини сертификатлаш ва синаш маркази фаолиятини ташкил этишни такомиллаштириш тўғрисида”ги қарори лойиҳаси эълон қилинди.

Қуйидагилар:

Ўзбекистон Республикаси Қишлоқ хўжалиги вазирлиги ҳузуридаги Қишлоқ хўжалиги техникаси ва технологияларини сертификатлаш ва синаш марказининг тузилмаси;

Ўзбекистон Республикаси Қишлоқ хўжалиги вазирлиги ҳузуридаги Қишлоқ хўжалиги техникаси ва технологияларини сертификатлаш ва синаш маркази ҳудудий филиалларининг намунавий тузилмаси;

Ўзбекистон Республикаси Қишлоқ хўжалиги вазирлиги ҳузуридаги Қишлоқ хўжалиги техникаси ва технологияларини сертификатлаш ва синаш маркази тўғрисидаги низом;

Ўзбекистон Республикаси Қишлоқ хўжалиги вазирлиги ҳузуридаги Қишлоқ хўжалиги техникаси ва технологияларини сертификатлаш ва синаш марказини ривожлантириш жамғармаси маблағларини шакллантириш ва улардан фойдаланиш тартиби тўғрисидаги низом;

Ўзбекистон Республикаси ҳудудида фойдаланишга тавсия қилинган қишлоқ хўжалиги ва мелиорация техникаларининг ягона давлат реестрини юритиш тартиби тўғрисида низом;

Ўзбекистон Республикасида ишлаб чиқарилган қишлоқ хўжалиги техникасининг даврий синовларини молиялаштириш тартиби тўғрисидаги низом;

Ўзбекистон Республикаси Қишлоқ хўжалиги вазирлиги ҳузуридаги Қишлоқ хўжалиги техникаси ва технологияларини сертификатлаш ва синаш марказида илмий-тадқиқот ишларини амалга ошириш тартиби тўғрисидаги низом;

2023 йил 1 январга қадар божхона божидан озод қилинадиган Ўзбекистон Республикасида ишлаб чиқарилмайдиган “Қишлоқ хўжалиги техникаси ва технологияларини сертификатлаш ва синаш маркази” томонидан харид қилинадиган қишлоқ хўжалиги техникалари ва технологияларини синаш ускуналари ва ўлчаш воситалари рўйхати тасдиқланади.

Белгилаб қўйилишича:

қишлоқ хўжалиги ва мелиорация техникаларини синаш учун ажратилган синов полигони ер майдонлари мақбуллаштирилмайди, шунингдек, ушбу ер майдонларига қишлоқ хўжалиги экинлари синов учун берилган қишлоқ хўжалиги ва мелиорация техникаларининг турлари ва синов ўтказиладиган агротехнологияларга асосан Ўзбекистон Республикаси Қишлоқ хўжалиги вазирлиги ҳузуридаги Қишлоқ хўжалиги техникаси ва технологияларини сертификатлаш ва синаш маркази томонидан тузилган тақсимот бўйича мустақил жойлаштирилади ва алмашлаб экиш тизими жорий қилинади;

синов полигонида техникаларни дала шароитида ўрганиш мақсадида фермер хўжаликлари иштирокида кўргазмали семинарлар ташкил қилинади;

синов полигони ер майдонлари солиқ солишдан озод этилган ер участкалари ҳисобланади.

Ўзбекистон Республикаси Қишлоқ хўжалиги вазирлиги, Иқтисодий тараққиёт ва камбағалликни қисқартириш вазирлиги, Инвестициялар ва ташқи савдо вазирлиги ҳамда Агросаноат мажмуи ва озиқ-овқат таъминоти соҳасидаги лойиҳаларни амалга ошириш агентлиги:

қишлоқ хўжалиги техникаларини халқаро талаблар асосида синаш учун замонавий синов ускуналари ва ўлчов воситалари рўйхатини шакллантириш ва харид қилиш ҳамда монтаж қилишда Туркия Республикаси Қишлоқ ва ўрмон хўжалиги ҳузуридаги “ТАMTEST” синов маркази, Германиянинг “DLG” қишлоқ хўжалиги жамияти, Чехия қишлоқ, ўрмон хўжалиги ва озиқ-овқат саноати машиналарини синаш давлат станцияси, Беларус машина синаш станцияси давлат муассасаси, Жанубий Корея саноат технология институти Жеонбук ҳудудий бўлими, Россия Федерациясининг илғор синов марказларидан мутахассисларни жалб қилиш ҳамда Марказни халқаро аккредитациядан ўтказиш мақсадида меъёрий ҳужжатларни тайёрлаш ва халқаро аккредитациядан ўтказиш Туркиянинг “TURKAK” халқаро аккредитация органи томонидан амалга оширилиши;

Хитой, Жанубий Корея, Туркия, АҚШ ва Япония давлатлари каби ушбу йўналишлар ривожланган мамлакатлар тажрибаларини ўрганиш ва ўзаро ҳамкорликни йўлга қўйиш бўйича халқаро ташкилотлар (FAO, GIZ, USAID, KOPIA, JICA ва бошқалар)нинг техник кўмаклари доирасида ўқув танишув сафарларини ташкил этиш. Бунда, Марказ ва манфаатдор вазирлик ва идораларнинг малакали мутахассислар иштирок этишини таъминлаш таклифлари маъқулланади.

Ўзбекистон Республикаси Қишлоқ хўжалиги вазирлиги халқаро аккредитация талаблари асосида лаборатория биноларини қуриш, реконструкция қилиш ва синовларни ташкил қилиш учун замонавий синов ускуналари, ўлчов воситаларини сотиб олишга, транспорт ва бошқа хизматлар бўйича тузиладиган шартномаларнинг асосланганлиги ҳамда улардан мақсадли фойдаланилиши устидан назоратни таъминлайди.

Марказга тендерлар ёки танлов савдолари ўтказмасдан энг яхши таклифларни танлаб олиш йўли билан халқаро аккредитация талаблари асосида синовларни ташкил қилиш учун замонавий синов ускуналари ва ўлчов воситаларини сотиб олишга, транспорт хизматлари, халқаро аккредитациядан ўтиш харажатлари, лаборатория биноларини қуриш, реконструкция қилиш ва бошқа хизматлар бўйича тўғридан-тўғри шартномалар тузишга, истисно тариқасида, рухсат берилади.

Ўзбeкистон Рeспубликаси Иқтисодий тараққиёт ва камбағалликни қисқартириш вазирлиги ҳузуридаги “Лойиҳалар ва импорт контрактларни комплeкс экспeртиза қилиш маркази” давлат унитар корхонаси халқаро аккредитация талаблари асосида синовларни ташкил қилиш учун замонавий синов ускуналари ва ўлчов воситаларини сотиб олишга, транспорт хизматлари, халқаро аккредитациядан ўтиш харажатлари ва бошқа хизматлар бўйича техник шартлар импорт шартномалар тушган кундан бошлаб уч кун муддатда экспертизадан ўтказилишини ва тегишли хулосалар берилишини таъминлайди.

Қуйидагилар:

2020 йил 11 июлда Ўзбекистон Республикаси ва Жаҳон банки ўртасида умумий қиймати 500 млн. АҚШ доллари бўлган “Қишлоқ хўжалигини модернизация қилиш” лойиҳасини амалга ошириш учун кредит битими имзоланган;

юқоридаги лойиҳадан умумий қиймати 5 млн. АҚШ доллари бўлган “Марказни моддий-техник базасини мустаҳкамлаш ва модернизация қилиш” инвестиция лойиҳаси молиялаштирилади.

“Марказни моддий-техник базасини мустаҳкамлаш ва модернизация қилиш” инвестиция лойиҳасини амалга оширишда:

Агросаноат мажмуи ва озиқ-овқат таъминоти соҳасидаги лойиҳаларни амалга ошириш агентлиги – буюртмачи;

тендерлар ёки танлов савдолари ўтказмасдан энг яхши таклифларни танлаб олиш йўли билан – бош пудратчи ташкилот қилиб белгиланади.

Ўзбекистон Республикаси Қишлоқ хўжалиги вазирлиги, Агросаноат мажмуи ва озиқ-овқат таъминоти соҳасидаги лойиҳаларни амалга ошириш агентлигига:

техник-иқтисодий асослар лойиҳасини ишлаб чиқишда прогрессив илғор хорижий синов марказлари тажрибасини ўрганиш ва ўзлаштириш бўйича комплекс ташкилий-техник чора-тадбирлар параметрларини инобатга олиниши;

2020 йил 10 декабргача инвестицион лойиҳа экспертизасини ваколатли органлар келишуви билан техник-иқтисодий асослар ўрнатилган тартибда тасдиқланишини таъминлайди.

“Ўзстандарт” агентлиги:

қишлоқ хўжалиги ва мелиорация техникалари, технологиялари ҳамда уларни синаш усулларига нисбатан талабларни белгилайдиган халқаро стандартлар билан Марказни таъминлаш ва талабномага асосан ўрнатилган тартибда Ўзбекистон Республикасининг давлат стандартлари шаклида қабул қилинишини таъминлайди;

Марказ томонидан харид қилинадиган замонавий синаш ускуналари ва ўлчаш воситаларини аттестациядан ўтказиш, метрологик тавсифларини аниқлаш (калибрлаш) ва ўрнатилган тартибда давлат реестрига киритиш чораларини кўради.

Ўзбекистон Республикаси Қишлоқ хўжалиги вазирлиги Инвестициялар ва ташқи савдо вазирлиги билан биргаликда Марказнинг ҳудудий филиаллари фаолиятини ташкил қилиш (техник жиҳозлаш) учун халқаро молия институтларининг грант маблағларини жалб қилишда – инвестицион лойиҳаларни ўрнатилган тартибда тасдиқланишида амалий ёрдам кўрсатади.

Вазирлар Маҳкамаси ҳузуридаги Агросаноат мажмуи устидан назорат қилиш инспекцияси томонидан 2021 йил 1 январдан ягона давлат реестрига киритилмаган қишлоқ хўжалиги ва мелиорация техникаларини, 2021 йилнинг 1 январига қадар ишлаб чиқарилган ва импорт қилинган техникалар бундан мустасно, давлат рўйхатидан ўтказилмаслиги белгиланади.

Ўзбекистон Республикаси Қишлоқ хўжалиги вазирлиги Ахборот технологиялари ва коммуникацияларини ривожлантириш вазирлиги, “Ўзстандарт” агентлиги, Вазирлар Маҳкамаси ҳузуридаги Агросаноат мажмуи устидан назорат қилиш инспекцияси билан биргаликда уч ой муддатда мувофиқлик сертификатига эга бўлган ва давлат синовларидан ўтган импорт қилинган ва республикада ишлаб чиқарилган қишлоқ хўжалиги ҳамда мелиорация техникаларининг ягона давлат реестри интеграциялашган ахборот тизимини юритиш бўйича халқаро молия институтларининг грантлари ва кредитлари маблағларини жалб қилиш чораларини кўради.

Ўзбекистон Республикаси Ахборот технологиялари ва коммуникацияларини ривожлантириш вазирлиги уч ой муддатда мувофиқлик сертификатига эга бўлган ва давлат синовларидан ўтган импорт қилинган ва республикада ишлаб чиқарилган қишлоқ хўжалиги ҳамда мелиорация техникаларининг ягона давлат реестри интеграциялашган ахборот тизимини ишлаб чиқади.