Япониялик тадбиркорлар Тошкентда Japanese Street лойиҳасини амалга ошириши мумкин

21 июль куни Тошкент шаҳар ҳокимлигида пойтахт ҳокими Жаҳонгир Ортиқхўжаев иштирокида Япония бизнес делегацияси билан учрашув бўлиб ўтди.

Фото: Тошкент шаҳар ҳокимлиги

Япония делегацияси вакиллари қабул ва маълумотлар учун миннатдорлик билдириб, ўзлари вакиллик қилаётган компаниялар фаолият йўналишлари ҳақида маълумот бериб ўтди. GIC holding директори Хаттори Ай пойтахтдаги йирик бизнес-маркази ҳудудида япон ресторанини ташкил этишга қизиқиш билдирди.

Япониялик тадбиркорлар япон ва ўзбек маданиятлари яқинлигини таъкидлаб, кичик овқатланиш нуқталари, япон маҳсулотлари ва эсдалик совғалар дўконлари жойлашган алоҳида кўчани ташкил қилишни кўзда тутувчи Japanese Street лойиҳасини амалга ошириш таклифини билдирди.

Меҳмонларнинг айтишича, бу кўча қўшма кўргазмалар, ярмарка ва фестиваллар ўтказиш учун ажойиб манзилга айланади ва пойтахтнинг туристик жозибадорлигини оширади.