Буюк Британия ноқонуний миграцияга қарши курашга 75 млн фунт ажратади

2023 йилда Буюк Британияга 30 мингга яқин мигрант келган. Мамлакат ҳукумати қочқинларни меҳмонхоналарга жойлаштириш учун кунига бир неча миллион фунт сарфламоқда.

Фото: AP

Буюк Британия ҳукумати ноқонуний миграцияга қарши чора-тадбирларни амалга оширишга 100 миллион долларга (75 миллион фунт) яқин маблағ ажратади. Бу ҳақда мамлакат Ташқи ишлар вазирлиги хабарида сўз боради.

«Чегара хавфсизлиги қўмондонлиги учун мўлжалланган 75 миллион фунт миқдордаги янги инвестициялар жорий йилнинг кузида иммиграция жиноятларига қарши курашга йўл очади», — дейилади хабарда.

Ушбу маблағлар қўмондонликни янги технология ва имкониятлар, шунингдек, қўшимча ходимлар билан таъминлашга сарфланади.

Ўтган ҳафта охирида ИИВ раҳбари Иветт Купер разведка хизмати, ҳуқуқ-тартибот органлари ва ҳукумат вакиллари иштирокида ноқонуний миграцияга қарши кураш муҳокамасига бағишланган йиғилишни ўтказган эди.

Таъкидланишича, 2023 йилда Буюк Британияга 30 мингга яқин мигрант келган. Мамлакат ҳукумати қочқинларни меҳмонхоналарга жойлаштириш учун кунига бир неча миллион фунт сарфламоқда.

Жорий йилнинг биринчи ярмида Европа Иттифоқи мамлакатларида, шунингдек, Норвегия ва Швейцарияда бошпана сўраб мурожаат қилинган аризалар сони бироз камайган, аммо ярим миллиондан ошади. Январдан июн ойининг охиригача Европа Иттифоқи бошпана агентлиги (EUAA) жами 513 000 та янги аризани қайд этган.