Alisher Xalilov 1988 yil, 21 fevralda Toshkent viloyati, Olmaliq tumanida tug‘ilgan. San'atga bo‘lgan qiziqish besh yoshligidan paydo bo‘lgan. Alisher Xalilovning kelajakda san'atni tanlashiga onasi turtki bo‘lgan. Qolaversa, u 12-13 yoshligida marhum ustoz san'aktor Muhriddin Xoliqovning qo‘shiqlarini tinglab, kelajakda u kabi serqirra ijod qilishni, xalqchil qo‘shiqlar yaratishni maqsad qilib qo‘yardi. Alisher maktab va tumanlararo o‘tkazilgan barcha tadbirlarda faol ishtirok etardi.
2010 yilda bo‘lib o‘tgan “O‘zbekiston seni kuylayman” nomli festivalning viloyat bosqichida maqom yo‘nalishi bo‘yicha faxrli 1-o‘rinni egalladi. 2010 yilda bo‘lib o‘tgan “Yagonasan muqaddas vatan!” ko‘rik tanlovining Respublika bosqichida 3-o‘rinni egalladi.
2006 yilda Hamza nomli musiqa kollejining an'anaviy xonandalik bo‘limini bitirib, hujjatlarini O‘zbekiston Davlat san'at institutiga topshirdi. Sog‘lig‘i pand berishi tufayli institutdagi o‘qishni tashlashga majbur bo‘lgan Alisher Halilov, ikki yildan so‘ng yana omadini sinab ko‘rishga ahd qildi. Ikki yil davomidagi izlanishlari samarasi o‘laroq, Alisher bu gal O‘zbekiston Davlat san'at institutiga grand asosida o‘qishga qabul qilinadi.
Alisher Xalilov Tursunoy Ismiyaminova, kollejda Hurriyat Isroilova, institutda O‘lmas Rasulov, Boir Holimirzayev singari ustozlar qo‘lida musiqa sirlaridan saboq oldi.
Alisher Xalilov ijodini boshlaganiga hech qancha vaqt bo‘lmay, bugungacha “Shaydo”, “Laylo”, “Kelinchak”, “Sensiz men tanho”, “Kelinchak”, “Ayol”, “Farg‘onaning yo‘llari”, "Shunga shunchami" va "Kabutarim" kabi qo‘shiqlarni kuyladi.
Alisher Xalilovning san'atga kirib kelishdan maqsadi kamtarona ijodi bilan o‘zbek milliy va zamonaviy estrada qo‘shiqchiligi san'atiga oz bo‘lsada o‘zining munosib hissasini qo‘shishdir...
Qalbi san'atga oshufta bo‘lgan yosh xofiz o‘z dilidagilarni samimiy tarzda ifoda etdi: -Muhriddin aka zamonida ijod qilmaganimdan, u kishidan bevosita talim olmaganimdan afsuslangan paytlarim bo‘lgan. Ammo menga bir narsa dalda beradi, ustoz Muhriddin aka oramizda bo‘lmasalarda, u insonning munosib shogirdi, maslahat olishim uchun men havas qilgan Ozodbek Nazarbekov bor. Ozodbek Nazarbekovga ovozim o‘xshaganligi uchun, ko‘pchilik mendan u kishidan talim olib turasanmi, deya so‘rashadi. Mening javobim esa shunday: Ustozning har bir yaratgan taronalari men uchun talim - ochiq dars vazifasini o‘taydi. Fursatdan foydalanib g‘oyibona ustozim Ozodbek akaga chin dilimdan sog‘lik tilab, o‘z minnatdorchiligimni bildiraman!