Prezident huzurida ishbilarmonlik muhitini yaxshilash bo‘yicha Davlat komissiyasi tashkil etilishi mumkin

O‘zbekiston Respublikasi normativ huquqiy hujjatlarning muhokamasi portalida Prezidentning “Tadbirkorlik faoliyatini rivojlantirishni qo‘llab-quvvatlash va biznes yuritish sharoitlarini yaxshilash tizimini tubdan takomillashtirish chora-tadbirlari to‘g‘risida”gi farmoni loyihasi muhokamaga qo‘yildi. Muhokama 31 avgust kuni yakuniga yetadi.

Hujjatga ko‘ra, ijobiy sarmoyaviy va ishbilarmonlik muhitini yaratish bo‘yicha davlat siyosatini samarali amalga oshirishga xalaqit beruvchi qator yo‘nalishlarda tizimli muammolar borligi ta'kidlanadi.

Ular orasida quyidagilar bor:

birinchi – tadbirkorlik sub'yektlarining hozirgi tasniflanishi va qonunchilik jihatidan aniqlashtirilishi xalqaro talablar hamda mezonlarga mos kelmaydi;

ikkinchi – soliq solishning amaldagi tizimi kichik korxonalar faoliyatini kengaytirish va yiriklashtirishni rag‘batlantirmaydi, sababi kichik tadbirkorlik sub'yektlari va yirik korxonalar o‘rtasidagi soliq yuklamasi keskin differentsiyalangan, soliq imtiyozlarini taqdim etishdagi tanlov uslubi xorijiy sarmoyalar va zamonaviy texnologiyalarni jalb etishni cheklaydi;

uchinchi – tadbirkorlik faoliyati sohasida zamonaviy talablarga javob bermaydigan litsenziyalar va ruxsat beruvchi jarayonlar saqlanib qolmoqda, eskirgan davlat tartibga solish usullari o‘rniga bozor mexanizmlari joriy etilmayapti, alohida davlat funksiyalarini jamoat nazorati va fuqarolik jamiyati institutlariga berish  talab etiladi, davlat-xususiy sheriklik prinsiplarini alohida davlat va nazorat funksiyalarini amalga oshirishga tatbiq etishni tezlashtirish lozim;

to‘rtinchi – tadbirkorlar vakolatli alohida davlat organlari tomonidan litsenziyalar, ruxsat beruvchi hujjatlarni rasmiylashtirish, shuningdek, davlat xizmatlarini ko‘rsatish bo‘yicha jarayonlarning asossiz uzaytirilishi bilan hamon to‘qnash kelishmoqda.

beshinchi – davlat organlarining ko‘plab nazorat funksiyalari saqlanib qolmoqda, nazorat organlari tomonidan tadbirkorlik sub'yektlari faoliyatini noqonuniy tekshiruvdan o‘tkazish amaliyoti yo‘q qilinmagan;

oltinchi – tadbirkorlik sub'yektlarining shakllanish jarayonida hamon haddan tashqari ko‘p tartib-qoidalar, shaffoflikning yo‘qligi va tadbirkorlik faoliyatini amalga oshirish uchun yer uchastkalarini taqdim etish tartiblari bir-biridan farq qilishi holatlari uchrab turibdi;

yettinchi – tadbirkorlik sub'yektlari moddiy-xomashyo resurslaridan foydalanishi bir qadar cheklangan, asosiy tovar-xomashyo bozorlariga kirishni ta'minlash bo‘yicha bozor mexanizmlarini kengaytirish talab etiladi;

sakkizinchi – tadbirkorlik sub'yektlarining bank-moliya, sug‘urta, baholash, rielterlik, konsalting muassasalari va bozor infratuzilmasining boshqa sub'yektlari bilan o‘zaro aloqasi zamonaviy bozor mexanizmlarini joriy etish hisobidan jiddiy yaxshilanishi lozim.

Farmon loyihasida O‘zbekiston Respublikasi Prezidenti huzurida tadbirkorlikni qo‘llab-quvvatlash va ishbilarmonlik muhitini takomillashtirish bo‘yicha Davlat komissiyasini tashkil etish rejalashtirilgan. Kichik va xususiy tadbirkorlik rivojini rag‘batlantirish bo‘yicha Respublika muvofiqlashtiruvchi kengashi tugatiladi.

Shuningdek, 2018 yil 1 yanvardan o‘z vaqtida soliqlar va boshqa majburiy to‘lovlarni to‘layotgan tadbirkorlik sub'yektlarining moliyaviy-xo‘jalik faoliyatini soliq tekshiruvidan o‘tkazishni taqiqlash nazarda tutilgan. 

O‘zbekiston Respublikasi iste'molchilar huquqlarini himoya qilish bo‘yicha Assotsiatsiyani qator masalalar bo‘yicha yagona vakolatli organ sifatida tashkil etish nazarda tutilgan.