Bugungi kunda bozorga biror yangi mahsulotni taklif qilish va unga xaridorlarni jalb etishda marketing faoliyati qanchalik to‘g‘ri yo‘lga qo‘yilgani muhim ahamiyatga ega. Shunga ko‘ra, Janubiy Koreyaning yetakchi Samsung kompaniyasining bu boradagi tajribasini o‘rganish foydadan xoli emas.
U o‘zining Galaxy nomli telefonini 2009 yili ishlab chiqdi. Galaxy i7500 reklamasi va Android Market (hozirgi Google Play) ilovalari o‘ziga xos edi. Smartfon shaklidagi fazoviy kema robot-android boshqaruvida yangi sayyoralarni kashf qilib sayohat qilar edi. U «Tarjimon sayyorasi», «Xaritalar sayyorasi»ni kashf qilgach, «O‘yinlar sayyorasi» va boshqa ilova «sayyora»larga o‘tar edi. Telefon egasi bundan hayron edi.
Yana bir reklamada smartfondan tashqari iMac ham ko‘zga tashlanadi. Reklamaning "Do the New" shiori undan boshqa hech qayerda qo‘llanilmadi.
2010 yili Galaxy S sotuvga chiqdi. Bu vaqtga kelib, «aqlli» telefon hech kim uchun yangilik bo‘lmagani sababli, kompaniya qurilmaning yangi funksiyalariga e'tibor qaratdi. Leo Burnett New York agentligining Samsung uchun ishlagan Epic reklama roligida AMOLED texnologiyasi yoritildi. Videoda ajdarlar bilan urushayotgan jangchilar aks ettirildi.
Yana bir rolikda Galaxy S xaridorlari boshqalardan ajralib turishi ta'kidlandi. Galaxy S haqidagi bir necha reklama roliklari "Turn on Tomorrow" («Kelajakni ishga tushiring») umumiy shiori bilan ishlab chiqilgandi.
Navbatdaagi Samsung Galaxy S II smartfonini xarid qilishni targ‘ib qiluvchi reklama "The Way We're Wired" («Bizni o‘zaro bog‘laydigan yo‘l») deb nomlangan edi. U avvalgilaridan sezilarli farq qildi. Uni Leo Burnett Chicago agentligi ishlab chiqdi. Reklama nafaqat smartfon, balki dunyo ham qanchalik o‘zgarganini namoyish etdi. Ayni shu konsepsiya Samsung tomonidan 2017 yilgi "The New Normal" reklamasida ham qo‘llanildi.
2011 yildan kompaniya o‘zining asosiy raqibi Apple korporatsiyasini mazax qila boshlaydi. Unda Apple Store do‘konlarida navbatda turgan iPhone muxlislari Galaxy tomon o‘tib ketgani uqdiriladi. Bu kabi ilk rolik Samsung tomonidan amalga oshirilgan "The Next Big Thing" keng qamrovli aksiyasida namoyish etildi.
