Jizzaxda aslida xorijga eksport qilinmay, soxta hujjatlar asosida ichki bozorga sotilgan avtomashinalar siri ochildi​

Jizzax viloyati bojxona boshqarmasi Kontrabanda va bojxona qonunchiligi buzilishiga qarshi kurashish bo‘limi hamda viloyat Ichki ishlar boshqarmasi xodimlari bilan hamkorlikda o‘tkazilgan tezkor tadbir davomida, soxta hujjatlar asosida ichki bozorda sotib yuborilgan bir qator transport vositalari fosh qilindi. Bu haqda Davlat bojxona qo‘mitasi Axborot xizmati Kun.uz'ga ma'lum qildi.

Ya'ni, GM Uzbekistan AJ tomonidan ishlab chiqarilgan va muqaddam qo‘shni davlatga eksport qilingan 20 dona turli rusumdagi transport vositalari ichki hududda noqonuniy ravishda sotib yuborilgan va ichki ishlar organlarida soxta ma'lumotlar asosida ro‘yxatga qo‘yilgani aniqlandi.

Bu holat Jizzax viloyati Ichki ishlar boshqarmasi Yo‘l harakati xavfsizligi boshqarmasidan olingan, transport vositalarini ro‘yxatga olish uchun asos bo‘lgan hisob-ma'lumotnomalarni o‘rganish davomida aniqlandi.

Jizzax shahri va viloyatning Zomin, Sh.Rashidov, Forish, Paxtakor, Do‘stlik, G‘allaorol kabi tumanlarida istiqomat qiluvchi ayrim fuqarolar nomiga rasmiylashtirib yuborilgan ushbu avtomashinalarga tegishli ma'lumotnomalar Namangan va Asaka shahridagi avtosalonlardan olingan.

Ammo, avtosalon egalari taqdim qilgan ma'lumotnomalar boshqa manzarani namoyon qildi. Ya'ni, hisob-ma'lumotnomalar aslida butunlay boshqa shaxslar nomiga va boshqa turdagi transport vositalari uchun rasmiylashtirilganligi, soxta hisob-ma'lumotnomalarda ko‘rsatilgan muhr va ism-shariflar esa soxta ekanligi ma'lum bo‘ldi.

Shuningdek, tergovga qadar tekshiruv davomida yuqoridagi avtotransport vositalarining 3tasi allaqachon jinoyat ishlari bo‘yicha Jizzax shahar sudining hukmiga asosan davlat egaligiga o‘tkazilib, kimoshdi savdosi orqali sotib yuborishga ham ulgurilgan. Boshqa 2ta avtotransport vositasi esa ayni paytda Sirdaryo viloyati Ichki ishlar boshqarmasi Yo‘l harakati xavfsizligi boshqarmasining joylardagi bo‘limlari tomonidan ro‘yxatga olingan.

Shunday qilib, soxtalashtiruvchining o‘zi yoki boshqa shaxs foydalanishi maqsadida muayyan huquq beradigan rasmiy hujjatlarni qalbakilashtirishda ifodalangan mazkur xatti-harakatlarda O‘zbekiston Respublikasi Jinoyat kodeksining 228-moddasi 1-qismida nazarda tutilgan jinoyat alomati mavjudligi sababli, mazkur modda bilan jinoyat ishi qo‘zg‘atilib, tegishlilik masalasi hal etish uchun viloyat prokuraturasiga yuborildi.

Bu jarayonda jabrlanuvchilar ya'ni, peshona teri evaziga topilgan mablag‘iga o‘zlari bilmagan holda soxta hujjatlar asosidagi avtomashinani sotib olgan shaxslar endi nima qilishadi? Hozircha avtomashinalar o‘z egalariga tilxat asosida qaytarib berilgan. Ammo, yakuniy so‘zni sud o‘z hukmida aytadi.