21 noyabr kuni O‘zbekiston Respublikasi normativ-huquqiy hujjatlar loyihalari muhokamasi portalida O‘zbekiston Respublikasining yangi tahrirdagi Soliq Kodeksi loyihasi xalq muhokamasi uchun joylashtirildi.
Loyiha portalga joylashtirilishi bilanoq internet foydalanuvchilari uni muhokama qilishni boshlab yuborishdi. Ammo loyihaning mazmunini muhokama qilish bilan birga, uning o‘zbek tilida e'lon qilinmagani borasida ham e'tirozlar bildirilmoqda.
«Boshqa chet tillarini ham hurmat qilgan holda shuni aytmoqchimanki, shunday muhim qonunning loyihasi ham davlat tilida muhokamaga qo‘yilmagani dilni xira qildi. Loyiha rahbariyati tomonidan o‘zbekzabon soliq to‘lovchilar (soliqchilar ham) uchun tez orada o‘zbekcha varianti ham qo‘yiladi degan umiddamiz», deb yozgan Shukur Sulaymonov.
Qonun loyihasining o‘zbek tilida ham e'lon qilinmagani borasida boshqalar ham o‘z fikrlarini bildirishgan.
E'tibor beradigan bo‘lsak, 20-21 noyabr kuni normativ-huquqiy hujjatlar loyihalari muhokamasi portalida 17ta qonun va qaror loyihalari muhokama uchun joylashtirilgan bo‘lib, ulardan 9tasi rus tilida, 8tasi o‘zbek tilida taqdim qilingan.
O‘zbekiston Respublikasi «Davlat tili haqida»gi Qonunining 1-moddasiga muvofiq, O‘zbekiston Respublikasining davlat tili o‘zbek tilidir.
Ushbu Qonunning 8-moddasida esa «O‘zbekiston Respublikasining qonunlari, davlat hokimiyati va boshqaruv organlarining boshqa hujjatlari davlat tilida qabul qilinadi va e'lon etiladi.
Bu hujjatlarning tarjimalari boshqa tillarda ham e'lon qilinadi.
Mahalliy hokimiyat va boshqaruv organlarining hujjatlari davlat tilida qabul qilinadi va e'lon etiladi. Muayyan millat vakillari zich yashaydigan joylarda mahalliy hokimiyat va boshqaruv organlarining hujjatlari respublika davlat tilida hamda mazkur millat tilida qabul qilinadi va e'lon etiladi», deyilgan.
Yuqoridagi Qonundan kelib chiqib hamda respublika aholisining 80 foizidan ortig‘i o‘zbek tilida so‘zlashishini inobatga olgan holda qonun loyihalari birinchi navbatda o‘zbek tilida joylashtirilsa (boshqa tillarga tarjimasi bilan birga albatta), xalqning qonunlardan xabardor bo‘lish ko‘rsatkichi oshishiga va qabul qilinajak qonunlar muhokamasida faol ishtirok etishiga ta'sir ko‘rsatishi tayin.
