Nega turoperatorlar qishda buyurtma qabul qilmayapti?

Samarqandda turizm masalalari bo‘yicha matbuot anjumanida shu masalaga ham to‘xtalib o‘tildi. Bu haqda Kun.uz muxbiri xabar bermoqda.

Tadbirda Samarqand viloyat hokimining turizm masalalari bo‘yicha o‘rinbosari Botir Nurillayev sohaga oid ma'lumotlarni taqdim etdi. Ta'kidlanishicha, bugungi kunda Samarqandda 142ta mehmonxona va 135ta oilaviy mehmonxonalar mavjud. Turoperatorlar soni esa 170ta.

2018 yil davomida Samarqandga 351 ming xorijiy, 2,1 million mahalliy sayyohlar tashrif buyurgan. 2019 yil 1 noyabrgacha bu ko‘rsatkich xorijiy sayyohlarda 491 ming, mahalliy sayyohlarda 2,18 millionni tashkil etgan.

Hokimlik ma'lumotiga ko‘ra, Samarqandda yaqin orada «halol turizm» yo‘nalishi yo‘lga qo‘yilishi kutilmoqda. Bugungi kunda Imom Buxoriy majmuasida tasdiqlangan reja asosida ziyorat mehmonxonalari qurilmoqda. Shuningdek, «halol» standarti bo‘yicha restoranlar va boshqa turdagi infrastruktura obektlari qurilishi boshlangan.

Bugungi kunda sayyohlarning Samarqandda qolish ko‘rsatkichi o‘rtacha 2,6 kunni tashkil etadi. Bu raqamni yana bir kunga oshirish maqsadida ziyorat turizmidan tashqari yana eko va etnoturizmni rivojlantirish ko‘zda tutilgan. Misol uchun, Samarqanddagi Zarafshon milliy bog‘i o‘ziga xos noyob tabiiy muhiti, o‘simlik va hayvonot olami bilan noyob turistik obekt hisoblanadi. Ekoturizmni rivojlantirish maqsadida hududdan 300 gektar yer ajratilgan. Bir qator xizmatlar yo‘lga qo‘yilgan. Ammo bu kabi loyihalarni rivojlantirish uchun shahar tashqarisida yo‘lning sifati, umuman, infratuzilmani shakllantirish lozim.

Viloyatdagi 23ta qishloqda etno, ekstremal, tog‘, agro va ekoturizmni yo‘lga qo‘yish imkoni bor. Aynan yuqoridagi muammo, yo‘l, kommunal sohaning sifatsizligi shu kungacha bu imkoniyatlardan foydalanishga to‘siq bo‘lib kelgan. Shundan kelib chiqib, belgilangan qishloqlarda 2020-2021 yillarda 121 kilometr yo‘llarni rekonstruksiya qilish, 13 kilometr piyodalar yo‘lagi qurish va ta'mirlash ko‘zda tutilgan.

Shahar markazidagi Islom Karimov ko‘chasi va uning atrofini esa o‘rta asrlar ko‘rinishida qayta ta'mirlash rejalashtirilgan. Unga ko‘ra, mazkur ko‘chadagi barcha savdo va maishiy xizmat ko‘rsatish obektlari, boshqa binolar tarixiy usulda qayta quriladi. Ko‘chadan atrofdagi mahallalarga yo‘lak ochilib, atrofdagi mahalla ham shunga monand ko‘rinish oladi.

Umuman, Samarqandda turizmni rivojlantirish bo‘yicha shu yil 30 sentyabrda Vazirlar Mahkamasi qarori ham e'lon qilingan. Ushbu hujjatda sohaga oid barcha muammolar qamrab olingan. Xususan, xalqaro moliya institutlari tomonidan ham sohaga yirik miqdorda investitsiya kiritish ko‘zda tutilmoqda.