Do‘konlar, restoranlar va fitnes-klublar pandemiya paytida qanday «jon saqlashi» kerak: 8 usul

Bunday sharoitda biznes qanday qilib «jon saqlash» vazifasi oldida turibdi va pul topishning yangi, ba'zida ijodiy usullarini izlamoqda.

Business Insider shunday usullarning 8tasini sanab o‘tdi.

Restoranlar ovqatni olib ketish yoki yetkazib berish xizmatini taklif qilmoqda

Avval ovqatni ofis va uylarga yetkazib bermaydigan muassasalar ham inqiroz tufayli bu xizmatni taklif qilishni boshladilar. Bu o‘zini izolyatsiyaga olgan yoki jamoat joylarini chetlab o‘tadigan mijozlarni qo‘llab-quvvatlash, shuning asnosida biznes yuritishning yaxshi usulidir.

Restoranlarda joy band qilish saytlari endi ovqat yetkazib berish uchun buyurtma olishyapti

Amerikaning Tock va Resy restoranlarda stol band qilish servislari o‘z saytini o‘zgartirib, pandemiya sharoitida umumiy ovqatlanish sohasiga yordam berishga qaror qilishgan. Endi bu saytlar orqali ovqatga buyurtma berish mumkin.

Restoranlar ommabop taomlarni tayyorlash uchun mahsulotlar to‘plamini sotmoqda

Bu xizmat ham Tock servisida mavjud. Restoranlar ommabop taomlarni tayyorlash uchun mahsulotlar to‘plamini sotmoqda. Mijozlar ulardan uyda mustaqil ravishda ovqat tayyorlashi mumkin. To‘plamga juda ko‘p mahsulotlar kiradi – go‘shtdan tortib sousgacha.

Restoranlar kontaksiz yetkazib berish xizmatini ishga tushirishdi

Fevral oyida KFC va Pizza Hut Xitoyda kontaksiz yetkazib berishni yo‘lga qo‘yishdi. Kurer manzilga borganida mahsulotlar o‘ramini yerga qo‘yadi va kamida 3 metr orqaga chekinadi. Chunki virus 2 metrgacha masofadan yuqishi mumkin.

Hozirgi vaqtda shunday usul dunyo bo‘yicha qo‘llanmoqda. Business Insider xabariga ko‘ra, ba'zi restoranlar yetkazib berishni bepul qilishgan. O‘z muassasasini yopishga majbur bo‘layotgan kompaniyalar uchun yetkazib berish xizmati biznesning muhim qismiga aylanishi mumkin.

Kichik biznes mijozlardan sovg‘a kartalarini sotib olishni so‘ramoqda

Sovg‘a kartalari kompaniyalarga hozirgi moliyaviy zararlarni qisqartirish imkonini beradi. Biroq bu qisqa muddatli yechim bo‘lib, istiqbolda moliyaviy zararni kamaytirishga yordam berolmaydi.

Fitnes-klublar onlayn ishlamoqda

Ommaviy tadbirlarga qo‘yilgan cheklovlar tufayli, Amerikaning Peloton fitnes-studiyasi uyda shug‘ullanish imkonini beruvchi ilovasiga oylik chegirmalarni taklif qilyapti. Meditatsiya uchun mo‘ljallangan Mindfl studiyalari tizimi Mindfl TV tashkil qilib, mashg‘ulotlarni virtual tarzda o‘tkazmoqda.

Restoranlarning ishsiz qolgan xodimlari onlayn-servislarga o‘tmoqda

Mart oyida Wildberries pandemiya tufayli ishdan bo‘shatilgan 3,5 ming rossiyalikni ishga joylashtirishga va'da berdi. Jyeff Bezos ham shunday qildi: milliarder restoran va barlardan ishdan bo‘shatilganlarni Amazon kompaniyasiga taklif qildi. Umumiy ovqatlanish muassasalari eshiklarini yopayotgan sharoitda marketpleys va yetkazib beruvchi servislar buyurtmalar oqimiga zo‘rg‘a bardosh berishyapti.

Kiyim-kechak do‘konlari onlayn savdolar hajmini oshirib, yetkazib berishni bepul qilishdi

Koronavirus pandemiyasi tufayli do‘konlar yopilmoqda. Ammo kompaniyalar baribir mijozlarni jalb qilishga intilmoqda. Natijada, so‘nggi paytlarda onlayn savdolar hajmi keskin oshdi.