Qonunlarga tadbirkorlik faoliyatini amalga oshirishni soddalashtiruvchi tuzatishlar kiritildi 

Qonun hujjatlariga turli sohalarda tadbirkorlik faoliyatini amalga oshirishni soddalashtiruvchi tuzatishlar kiritildi. Bu haqda Norma xabar bermoqda.
 
Birinchi tuzatish – “Tadbirkorlik faoliyati erkinligining kafolatlari to‘g‘risida”gi qonunga. Yakka tartibdagi tadbirkorlar - hunarmandlar ko‘pi bilan 5 nafar shogirdni jalb qilishlari mumkin bo‘lgan shart bekor qilindi. Ularning soni endi cheklanmaydi.
 
Ikkinchisi – qimmatbaho metallarni oltin izlovchilar usulida kavlab olish uchun yer qa'ri uchastkalari, jumladan sochma oltin konlarining eng yuqori o‘lchamlari 1 gektardan 5 gektargacha oshirildi. Tegishli o‘zgartirishlar “Yer osti boyliklari to‘g‘risida”gi qonunga kiritildi. 
 
Uchinchisi - korxonalar, muassasalar va tashkilotlar tugatilayotganda o‘zlarining arxiv hujjatlarini endi davlat yoki nodavlat arxivlariga topshirishga haqlidirlar. Bu “Arxiv ishi to‘g‘risida”gi qonunda mustahkamlangan. Ilgari qonun bunday tanlov imkoniyatini taqdim etmagan – hujjatlar faqat davlat arxiviga topshirilgan.
 
Qonun 4.12.2020 yildan kuchga kirdi.