20:09 / 29.03.2023
22310

Ukraina mudofaa vaziri qarshi hujum qachon boshlanishini aytdi

Ijtimoiy tarmoqlarda ukrainlarning ko‘p miqdordagi harbiy texnikalari bir joyga to‘planib turgani aks etgan videolar tarqalmoqda.

Foto: The New York Times

Ukraina qurolli kuchlari bosh shtabi qarshi hujumni bahordayoq boshlashni rejalashtirmoqda — bu katta ehtimol bilan aprel-may oylarida bo‘ladi. Bu haqda Ukraina mudofaa vaziri Oleksiy Reznikov Estoniyaning ERR telekompaniyasi efirida aytib o‘tdi.

Vazir jurnalistlarning nemislarning Leopard tanklari oldingi chiziqqa qachon yetib borishi haqidagi savoliga javoban shunday bayonot berdi. Reznikovning so‘zlariga ko‘ra, bu qarshi hujum vaqtida ro‘y beradi, bu hujumni boshlash uchun eng qulay vaqtni Bosh shtab tanlaydi.

Reznikovning qo‘shimcha qilishicha, ukrainlarning yurishi bir necha yo‘nalishlar bo‘ylab amalga oshirilishi rejalashtirilmoqda. U amaliyotning boshlanishiga ob-havo sharoiti ta’sir ko‘rsatishi mumkinligini qayd etgan. «Bahorda bizning yerlar juda nam bo‘ladi. Faqat gusenitsali transportdan foydalanish mumkin. O‘ylaymanki, biz ularni [Leopard tanklari] aprel-may oylarida ko‘ramiz», — degan vazir.

Yurishning o‘zi haqida gapirarkan, vazir 2023 yil mobaynida dunyo «Ukraina uchun juda ijobiy o‘zgarishlarga guvoh bo‘lishi»ni aytib o‘tdi. «Ishonchim komilki, biz Kiyev, Chernihiv, Sumi, Xarkiv va Xersonda bo‘lgani kabi vaqtincha bosib olingan hududlarimizni ozod etishni davom ettiramiz», — deya qo‘shimcha qilgan u.

Vazir ijtimoiy tarmoqdagi sahifalarida yaqinda Ukrainaga yetib kelgan nemislarning Marder piyodalar jangovar mashinalari videosini namoyish etgan va ittifoqchilarga minnatdorchilik bildirgan.

Shuningdek, bugun ukrainalik deputat Goncharenko katta miqdorda armiya texnikalari to‘plangan videoni e’lon qildi. Videoda tanklar, gusenitsali va g‘ildirakli texnikalar, baravar o‘t ochish reaktiv tizimlarini ko‘rish mumkin. 

  • 27 mart kuni Ukrainaga nemislarning Leopard 2 rusumli tanklaridan dastlabki 18 tasi yetib kelgani ma’lum bo‘ldi. Fevral oyi oxirida Ukrainaga Polshadan Leopard 2 tanklarining ilk partiyasi kelgandi.
  • 21 mart kuni AQSh Ukrainaga Abrams tanklarining nisbatan eski modellarini jo‘natishga qaror qildi, chunki bunday tanklardan amerikalik harbiylar allaqachon foydalanmoqda va ularni harbiy harakatlar hududiga tezroq yetkazish mumkin.
  • Ukrainaning Fransiyadagi elchisi Vadim Omelchenkoning so‘zlariga ko‘ra, yanvar oyi oxiriga kelib G‘arb mamlakatlari Kiyevga 300 dan ortiq tank yetkazishni va’da qilgandi. Keyinroq Germaniya hukumati ham Ukrainaga oldinroq va’da qilinganiga qo‘shimcha ravishda Leopard 1 rusumli 178 tank yuborishini e’lon qildi. 
Mavzu
Rossiya-Ukraina urushi
2022 yil 22 fevral kuni Rossiya Ukraina chegarasidan o‘tib, qo‘shni mamlakatga bostirib kirdi. Ukraina armiyasi jang taklif qildi.
Barchasi
Top