Yevropa Ittifoqi erkin savdo kelishuvi tufayli Yangi Zelandiyaga sarmoyani 80 foizga, savdo hajmini 30 foizga oshirish niyatida.
Yevropa Ittifoqi va Yangi Zelandiya vakillari o‘zaro erkin savdo, shuningdek, Yevropa Ittifoqi turli tadqiqotlarga sarmoya kiritadigan Horizon Europe dasturida Yangi Zelandiyaning ishtiroki to‘g‘risida shartnoma imzoladi. Hujjatning 9 iyul, yakshanba kuni imzolanishi Yevrokomissiya raisi Ursula fon der Lyayyen va Yangi Zelandiya bosh vaziri Kris Xipkinsning qo‘shma murojaatida izohlandi.
Yevrokomissiya rahbarining so‘zlariga ko‘ra, kelishuvlar imzolanishi YeI davlatlari va orol davlati o‘rtasidagi tovar ayirboshlash hajmini 30 foizga, Yevropa Ittifoqining Yangi Zelandiyadagi sarmoyasini 80 foizga oshiradi. «Biz eng yaxshi iste’dodlarimizni birlashtirishni intiqlik bilan kutamiz, shunda yangi avlod zararsiz texnologiyalar, biotexnologiyalar, raqamli loyihalar, sog‘liqni saqlash sohasida hamkorlik qilishimiz mumkin», dedi fon der Lyayyen.
O‘z navbatida, Yangi Zelandiya bosh vaziri Yevropa Ittifoqi bilan imzolangan kelishuv «har ikki hamkorga ham katta foyda keltirishi» hamda davlat va Yevropa Ittifoqining qo‘shma qadriyatlarini aks ettirishini ta’kidladi.
Imzolangan erkin savdo bitimini «yangilik» deb atash mumkin, dedi Yevrokomissiya rahbari. «Biz birinchi marta savdo bitimiga iqlim bo‘yicha Parij kelishuvi majburiyatlarini kiritdik», deb tushuntirdi u.
Gap 2015 yilda dunyoning 196 ta davlati tomonidan qabul qilingan rezolyutsiya haqida ketmoqda, unda 21-asrda sayyoradagi o‘rtacha haroratning sanoat davrigacha bo‘lgan darajaga nisbatan 1,5 darajadan ortiq Tselsiyga oshishiga yo‘l qo‘ymaslik maqsadi belgilab qo‘yilgan.
Hujjat maqsadlarining bajarilishi shartnomani imzolagan davlatlar tomonidan har doim ham amalga oshirilmagan, chunki rezolyutsiya jarimalarni nazarda tutmagan va hisob-kitoblar mamlakatlarning o‘zlari tegishli qonunlarni kiritishi kerakligiga asoslangan. Germaniyada bu nyuans eko-faollar va davlat o‘rtasida sud jarayoniga olib keldi hamda davlat bu jarayonda mag‘lub bo‘ldi.
