Jahon | 08:20 / 21.06.2024
3938
3 daqiqa o‘qiladi

Janubiy Koreya Ukrainaga qurol yetkazib berishni boshlashi mumkin

Seul o‘z pozitsiyasini Rossiya va KXDR strategik sheriklik to‘g‘risidagi bitim imzolagani sababli o‘zgartirdi. Janubiy Koreya dunyodagi eng yirik qurol yetkazib beruvchilardan biridir.

Foto: AP

Janubiy Koreya Rossiya va KXDR o‘rtasida hamkorlik, mudofaa va strategik sheriklik to‘g‘risidagi bitim tuzilgach, Ukrainaga qurol yetkazib berish masalasini ko‘rib chiqadi, dedi 20 iyun, payshanba kuni mamlakatning milliy xavfsizlik bo‘yicha maslahatchisi Chang Xo Jin. Seul hukumati «jiddiy xavotir bildiradi va kelishuv imzolanishini qoralaydi», deya ta’kidladi u va Shimoliy Koreyaning harbiy kuchini mustahkamlashga bevosita yoki bilvosita hissa qo‘shadigan har qanday hamkorlik BMT Xavfsizlik kengashi rezolyutsiyalarini buzish ekanligini qo‘shimcha qildi.

Janubiy Koreya prezidenti idorasi Seulning Kiyevga qurol-yarog‘ yetkazib berish masalasini qayta ko‘rib chiqayotgani haqidagi xabarlarni na tasdiqladi, na inkor etdi, bu ular hozircha bu mavzuda ochiq izoh bermasliklarini ko‘rsatmoqda. «Aniq chora-tadbirlar keyinroq e’lon qilinadi, biz rejalarni oldindan oshkor qilmoqchi emasmiz va Rossiyaning munosabati bilan qiziqamiz», - deya tushuntirdi Janubiy Koreya prezidenti idorasidagi manba «Renxap» axborot agentligiga.

Asosiy qurol yetkazib beruvchi 

Janubiy Koreya dunyodagi eng yirik qurol yetkazib beruvchilardan biri, ammo u Ukrainaga qurol yubormaydi. Rossiya prezidenti Vladimir Putin yaqinda ikki davlat munosabatlaridagi bu holatni qadrlashini aytdi. Shu bilan birga, ayrim jahon OAV Janubiy Koreya snaryadlari Vashington ularni u yerdan Ukrainaga olib borishi uchun AQShga yetkazib berilishi mumkinligi haqida xabar berdi. 

Hamkorlik shartnomasini Rossiya prezidenti Vladimir Putin va Shimoliy Koreya yetakchisi Kim Chen In 19 iyun kuni imzolagan edi. Hujjat bandlaridan biri uchinchi davlat tomonidan hujum sodir bo‘lgan taqdirda tomonlarga o‘zaro harbiy yordamni kafolatlaydi. 

1948 yilgacha yagona davlat bo‘lgan Janubiy va Shimoliy Koreya 1950 yildan buyon rasman urush olib bormoqda. Yuz minglab odamlarning o‘limiga olib kelgan shiddatli janglardan so‘ng, mamlakatlar 1953 yilda sulh imzoladilar. O‘shandan beri ular tinchlik shartnomasini tuzmagan.

Mavzuga oid