Join KUN.UZ Telegram kanaliga qo‘shiling va eng so‘nggi yangiliklardan xabardor bo‘ling! A'zo bo'lish
x
Yangi namunadagi milliy haydovchilik guvohnomasining amal qilish muddati qancha?
23:00 / 07.07.2018
74684

Vazirlar Mahkamasining “Milliy haydovchilik guvohnomasining hamda avtomototransport vositasi ro'yxatdan o'tkazilganligi to'g'risidagi guvohnomaning yangi namunalarini joriy etish chora-tadbirlari to'g'risida”gi 2017 yil 2 martdagi 116-son qarori bilan milliy haydovchilik guvohnomasining hamda avtomototransport vositasi ro'yxatdan o'tkazilganligi to'g'risidagi guvohnomaning yangi namunalari joriy etilgan edi.

Yangi namunadagi milliy haydovchilik guvohnomalari va avtomototransport vositasi ro'yxatdan o'tkazilganligi to'g'risidagi guvohnomalar “Yo'l harakati to'g'risida”gi xalqaro Vena konvensiyasi hamda xalqaro standartlar tavsiyalari asosida ishlab chiqilgan bo'lib, qurilmalar o'rtasida ma`lumotlarni bevosita aloqasiz amalga oshirish imkonini beruvchi maxsus elektron belgi (ya`ni NFC chip) ga ega plastik kartalar shaklida tayyorlanadi.

Amaldagi milliy haydovchilik guvohnomalarini yangi namunadagi milliy haydovchilik guvohnomalariga almashtirish jarayoni 2017 yil 1 oktabrdan boshlangan bo'lib, 2020 yil 31 dekabrda tugaydi. Eski namunadagi milliy haydovchilik guvohnomalari 2021 yil 1 yanvardan boshlab haqiqiy emas deb hisoblanadi.

Avtomototransport vositasi ro'yxatdan o'tkazilganligi to'g'risidagi guvohnomani yangi namunadagi guvohnomaga almashtirish 2017-2020 yillar mobaynida bosqichma-bosqich – avtomototransport vositasini majburiy texnik ko'rikdan o'tkazishda amalga oshiriladi.

Yangi namunadagi milliy haydovchilik guvohnomasining amal qilish muddati 10 yil.

Shuni alohida ta`kidlash lozimki, yangi namunadagi milliy haydovchilik guvohnomasiga egasining shaxsini tasdiqlovchi rasmiy davlat hujjati maqomi berildi. Boshqacha qilib aytganda, yangi namunadagi milliy haydovchilik guvohnomasi O'zbekiston Respublikasi fuqarolik pasportiga tenglashtirildi. Bu esa xalqimiz turmush darajasi va sifatini oshirishda keng imkoniyatlar eshigini ochadi.

Endilikda joylarda aholiga davlat xizmatlari ko'rsatishni yanada yaxshilash maqsadida yangi namunadagi milliy haydovchilik guvohnomalarini nafaqat Yo'l harakati xavfsizligi boshqarmalarining ro'yxatdan o'tkazish va imtihon olish bo'limlari orqali balki, Adliya vazirligi huzuridagi davlat xizmatlari markazlari orqali ham almashtirib olish imkoniyati yaratildi.

Ayni vaqtda amaldagi haydovchilik guvohnomalarini va avtomototransport vositasi ro'yxatdan o'tkazilganligi to'g'risidagi guvohnomalarni yangi namunadagi guvohnomalarga almashtirib olish jarayoni qulay, oson va tez.

Qo'shimcha ravishda shuni ma`lum qilamizki, 2021 yilning 1 yanvariga qadar texnik ko'rikdan o'tkazilganligi to'g'risidagi talon, avtomototransport vositasidan foydalanish va (yoki) tasarruf etish huquqi yuzasidan ishonchnoma,transport vositasi egasining fuqarolik javobgarligini majburiy sug'urtalash polisi bosqichma-bosqich elektron shaklga o'tkaziladi, ya`ni ular NFC chipi ichiga kiritiladi.

Ushbu hujjatlarni qog'oz shaklida majburiy rasmiylashtirish to'g'risidagi talab bekor qilinadi.

O'zbekiston Respublikasi Ichki ishlar vazirligi Yo'l harakati xavfsizligi bosh boshqarmasi.

Top