“O‘zbekiston temir yo‘llari” AJ va “O‘zbekiston havo yo‘llari” MAK 2018 yil 1 apreldan vaqtinchalik mehnat faoliyatini amalga oshirish uchun respublikadan tashqariga chiqayotgan fuqarolarga platskart va umumiy vagonlarga temir yo‘l chiptalari hamda iqtisodiy (ekonom) klass aviachiptalar narxlariga 20 foizgacha chegirma taqdim etadi. Vaqtinchalik mehnat faoliyatini amalga oshirish uchun respublikadan tashqariga chiqayotgan har bir fuqaroga temir yo‘l va aviachipta xarid qilish xarajatlarini qisman qoplash uchun 300 ming so‘m miqdorda beg‘araz to‘lov bir yilda bir marta amalga oshiriladi.
Chet elga vaqtincha ishlash uchun chiqayotgan fuqarolar bilan ish olib borish bo‘yicha sektor vakillari uyma-uy yurish asosida xorijga chiqishni rejalashtirayotgan fuqarolarni aniqlaydi va ularga imtiyozli chiptalarni sotib olish hamda xavfsiz chiqish masalalarini tushuntiradi.
Ehtimoliy mehnat migrantlari elektron ma'lumotlar bazasida ro‘yxatdan o‘tish uchun Tashqi mehnat migratsiyasi agentligiga (imtiyozlarni chiptani sotib olishning majburiy sharti) yuboriladi. Zarur bo‘lganda, sektorlar va agentliklar imtiyozli chiptalar olish uchun jamoaviy ariza berish uchun guruhlarni tashkil etadilar.
Tashqi mehnat migratsiyasi agentligiga ariza topshirilgan kundan boshlab, fuqaro ehtimoliy ish joyi, yo‘nalish va jo‘nab ketish sanasini ko‘rsatib, ma'lumotlar bazasida ro‘yxatga olinadi.
Agentlik o‘sha kuni valyuta hisob raqamini ochish va mehnat migrantlari uchun maxsus Visa kartasini berish uchun fuqaro haqidagi ma'lumotni «Aloqabank» bankiga, shuningdek, agentlik huzuridagi temir yo‘l va aviachiptalarni bronlash hamda sotish bo‘yicha ixtisoslashgan kassaga yuboradi.
Kassa bir ish kuni mobaynida «O‘zbekiston temir yo‘llari» yoki «O‘zbekiston havo yo‘llari»ga chiptani bron qilish uchun murojaat yuboradi. Tashuvchi bir ish kuni mobaynida chiptani bronlashi kerak.
Bronlash haqida ma'lumotni olgach, kassa ikki ish kuni mobaynida fuqaroga chipta savdosi joyi va jo‘nash sanasini ma'lum qiladi.
Fuqaro maxsus kassaga murojaat qiladi, u o‘sha kuniyoq chiptani imtiyozli tarif (minus 20%) va 300 000 so‘mlik chegirma (bir yilda bir marta) orqali sotishi kerak.
«Aloqabank» mehnat migrantiga valyuta hisobini ochadi va bir ish kuni mobaynida Visa kartasini beradi. Kartada minimal komissiya va nol summalik sug‘urta depoziti mavjud.
Tasdiqlangan sxema bo‘yicha jami chegirmali chipta berish uchun yetti kundan ortiq vaqt talab qilinmaydi.
“O‘zbekiston temir yo‘llari” AJ chiptalariga chegirmalar platskart va umumiy vagonlarga, “O‘zbekiston havo yo‘llari”ga esa - iqtisodiy (ekonom) klassga taqdim etiladi.
Chipta sotib olayotganda hayot va sog‘liq sug‘urtasini rasmiylashtirish uchun murojaat qilish mumkin. Bundan tashqari, milliy tashuvchining chet elga vaqtincha ishlash uchun chiqadigan fuqarolarga javobgarlik sug‘urta mexanizmini joriy etish rejalashtirilgan.
“Ipoteka bank” tomonidan vaqtinchalik mehnat faoliyatini amalga oshirish uchun respublikadan tashqariga chiqayotgan fuqarolarga 1000 AQSh dollari ekvivalentida kredit ajratish ham nazarda tutilgan.
