Namangan viloyatining Mingbuloq tumanida 2018 yil 14 oktabr kuni “Ingichka” MFY hududida joylashgan “Navoiy” paxta qabul qilish maskanidagi 2-sonli paxta g‘aramlash maydonchasiga bosib qo‘yilgan paxta g‘aramida yong‘in sodir bo‘lgan.
O‘zbekiston Respublikasi IIV Jamoatchilik va ommaviy axborot vositalari bilan aloqalar boshqarmasi xabariga ko‘ra, ko‘rilgan choralar natijasida yong‘in o‘chirilgan. Yong‘in oqibatida 74 kg. 2-navli paxta yonib zarar ko‘rgan. Jarohat olganlar yo‘q.
Qayd etilishicha, yong‘in paxta g‘aramini shamollatish moslamasining motor qismida elektr simlarini qisqa tutashuvidan kelib chiqqanligi aniqlangan. Surishtiruv ishlari olib borilmoqda.
Eslatib o‘tamiz, avvalroq Samarqandda yuk mashinasidagi 20 toy paxta yonib ketgandi.
