AQSh marshal Halifa Haftar armiyasi bo‘linmalaridan Liviya poytaxti Tripoliga yurishni darhol to‘xtatishni talab qildi. Bu haqda AQSh davlat kotibi Mayk Pompeo aytib o‘tdi.
“AQSh Tripoli yaqinidagi jangovar harakatlardan xavotirda. Biz Halifa Haftar kuchlarining hujumiga qarshi ekanligimizni ravshan tushuntirdik va Liviya poytaxtiga qarshi bu harbiy operatsiyalarni darhol to‘xtatishga chaqiramiz. Kuchlar avvalgi pozitsiyalariga qaytishi lozim”, deb aytilgan Pompeoning yozma bayonotida.
Davlat kotibining aytishicha, “Tripoliga bir tomonlama hujum oddiy fuqarolar hayotiga xavf soladi va liviyaliklar uchun yaxshiroq kelajakka istiqbollarga putur yetkazadi”.
Pompeoning ta'kidlashicha, AQSh ixtilofning harbiy yechimi yo‘qligiga ishonchi komil. “Shu sababli AQSh xalqaro maydondagi sheriklari bilan Liviya yetakchilariga BMT bosh kotibining maxsus vakili vositachiligida siyosiy muzokaralarga qaytishlari uchun bosim o‘tkazishni davom ettirmoqda. Siyosiy yechim – mamlakatni birlashtirish uchun yagona yo‘ldir”, deb o‘z so‘zlarini yakunlagan AQSh davlat kotibi.
