Samarqand viloyati pillakorlari pilla topshirish shartnomaviy rejasini bajarishdi.
«Ob-havoning seryog‘in kelishi va tabiat injiqlariga qaramasdan viloyatimiz kumush tola ijodkorlari yilning qaldirg‘och hosili bo‘lgan pilla yetishtirish bo‘yicha shartnomaviy topshiriqni 2645 tonna o‘rniga 2646,6 tonnaga yoki 100,1 foizga bajarib yuqori ko‘rsatkichlarga erishdilar», — deyiladi viloyat hokimi E.Turdimovning pillakorlarga tabrigida.
Xususan, Past Darg‘om, Kattaqo‘rg‘on, Narpay, Bulung‘ur, Ishtixon tumanlari pillakorlari viloyatda birinchilardan bo‘lib shartnomaviy rejalarini bajarib yuqori ko‘rsatkichlarga erishishgan. Jumladan, Past Darg‘om tuman pillakorlari 243,8 tonna o‘rniga 272,4 tonna pilla yetishtirib, shartnomaviy rejani 111,7 foizga bajarishgan.
Yetishtirilgan pilla xom-ashyosi yuqori navlarga qabul qilinib, viloyat bo‘yicha har bir qutidan o‘rtacha 56–57 kilogrammdan hosil olingan.
