Qo‘qon shahrida 10-15 sentabr kunlari bo‘lib o‘tadigan Xalqaro hunarmandchilik festivaliga tayyorgarlik jarayonlariga bag‘ishlangan matbuot anjumani bo‘lib o‘tdi, deb xabar berdi O‘zA.
Tayyorgarlik jarayonining borishi haqida Qo‘qon shahar hokimi M.Usmonov, festival matbuot markazi rahbari S.Shukurov va boshqalar ma'lumot berdi.
O‘zbekiston prezidentining 2018 yil 1 noyabrdagi “Xalqaro hunarmandchilik festivalini o‘tkazish to‘g‘risida”gi qarori asosida ayni kunlarda mazkur nufuzli tadbirga qizg‘in tayyorgarlik ko‘rilmoqda. Ko‘cha va xiyobonlar obodonlashtirilib, mehmonxonalar, xizmat ko‘rsatish va servis majmualari, turli inshootlar qad rostlamoqda.
Ishtirokchilar uchun yangidan qurilayotgan mehmonxonalarning 3 tasida qurilish ishlari yakunlandi, 5 tasida davom etmoqda, qo‘shimcha ravishda 30 uy-mehmonxonasi tashkil etish borasida tegishli ishlar olib borilmoqda.
Axborot texnologiyalari va kommunikatsiyalarini rivojlantirish vazirligi ko‘magida festival veb-sayti o‘zbek, rus, ingliz tillarida (http://handicrafters.uz) yaratildi. Veb-saytga festival, milliy hunarmandchilik, hunarmandlar, ular tomonidan ishlab chiqarilayotgan mahsulotlar haqidagi ma'lumotlar joylashtirildi. Festivalda ishtirok etishni xohlagan xorijlik va mahalliy hunarmandlar ushbu sayt orqali onlayn tarzda ariza berishi va ro‘yxatdan o‘tishi mumkin. Bu haqda Tashqi ishlar vazirligi orqali O‘zbekistonning chet eldagi elchixonalariga ma'lumot berildi.
30 iyun kuni veb-sayt orqali ro‘yxatdan o‘tish jarayoni yakunlandi. Veb-sayt orqali 74 davlatdan 480 kishi ro‘yxatdan o‘tdi. Saralash komissiyasi tomonidan 72 davlatdan hunarmandchilikning 29 yo‘nalishi bo‘yicha 205 xorijiy hunarmand saralab olindi. Shuningdek, faxriy mehmon sifatida taklif etilishi rejalashtirilgan 36 yuqori martabali xorijlik davlat arboblari, qo‘mita raislari, vazir o‘rinbosarlari va olimlar ro‘yxati shakllantirilgan. Barcha xorijiy mehmon va ishtirokchilarga rasmiy taklifnomalar jo‘natildi.
“Hunarmandchilik va xalq amaliy san'atini rivojlantirish istiqbollari“ mavzuidagi ilmiy-amaliy konferensiyada 23 davlatdan 32 xorijiy va mahalliy olim ishtirok etishi belgilandi. Konferensiyaning ikki kunlik dasturi va konsepsiyasi ishlab chiqildi.
Festivalda ishtirok etish uchun respublikamizning 153 tumanidan hunarmandchilikning 34 yo‘nalishi bo‘yicha 1116 hunarmand va 87 tashkilotchi ro‘yxati shakllantirildi.
Farg‘ona viloyati hokimligi va tegishli tashkilotlar mas'ullari ishtirokida Toshkent, Namangan, Farg‘ona viloyatlari aeroportlari va temir yo‘l vokzallarida doimiy navbatchilik tashkil qilingan. Viloyat hokimligi tomonidan mehmonlarni kutib olish, joylashtirish va kuzatish bo‘yicha ishchi guruhlar shakllantirilgan.
