12 avgust kuni O‘zbekiston Respublikasi Prezidenti Shavkat Mirziyoyev raisligida iqtisodiyot tarmoqlari va hududlarning eksport salohiyatini oshirish, ulardan samarali foydalanish, investitsiyalarni, avvalo, to‘g‘ridan-to‘g‘ri xorijiy investitsiyalarni jalb qilish va o‘zlashtirish, ishlab chiqarishni mahalliylashtirish ko‘lamini kengaytirish masalalariga bag‘ishlangan videoselektor yig‘ilishi o‘tkazildi.
Unda prezident ko‘plab masalalarga to‘xtalib o‘tdi.
Selektorda so‘zga chiqqan Qashqadaryo viloyat hokimi Zafar Ro‘ziyev bu yil paxta yaxshi bo‘layotgani, uni yetishtirish uchun barcha sharoitlar yaratilayotganini aytdi.
«Bu yil paxtada suvdan ham, o‘g‘itdan ham muammo bo‘lmadi. Zararkunandalardan tozalash uchun ham 14 milliard so‘m oldik», — dedi Qashqadaryo viloyat hokimi.
Prezident Ro‘ziyevning paxta haqidagi gaplaridan so‘ng barcha hokimlarga bu yil paxta terimiga budjet tashkilotlari jalb qilinmasligini eslatib o‘tdi.
«Bu yil paxta [terimi]ga maktab, institut — umuman, birorta budjet tashkilotlari olib chiqilmaydi, eslaringdan chiqmasin», — deb Shavkat Mirziyoyevning so‘zlarini keltirmoqda Kun.uz muxbiri.
