O‘zbekiston ichki ishlar vazirligining tergov departamenti Kamerun fuqarolari tomonidan sodir etilgan firibgarlik jinoyatlari bo‘yicha dastlabki tergov harakatlarini olib bormoqda.
“Agar siz suratlarda ko‘rsatilgan shaxslarning jinoiy harakatlaridan jabr ko‘rgan bo‘lsangiz, yaqin oradagi ichki ishlar bo‘limiga yoki “102” telefoni hamda IIV tergov departamentining (+99871) 231-30-97, (+99871) 231-36-22 va (+99871) 233-65-34 telefonlari orqali murojaat qilishingizni so‘raymiz”, deyilgan departament xabarida.
OAV ma'lumotlariga ko‘ra, kamerunlik firibgarlar ba'zida MDH davlatlarida o‘z qing‘irliklari bilan shug‘ullanishadi. Jumladan, 2015 yilda Moskvada ishonuvchan kishilarning pullarini qora jodu amali bahonasi ostida o‘g‘irlagan ikki kamerunlik qo‘lga olingan.
Qozog‘istonda esa kamerunliklar qora qog‘ozni dollarlar o‘rniga sotmoqchi bo‘lgan.
Keyinroq Moskvada o‘zini Rossiyaning “Gazprom”, “Rosneft”, RJD kabi yirik kompaniyalari xodimlari sifatida tanishtirib, butun dunyo bo‘ylab tadbirkorlarni aldab yurgan afrikalik firibgarlar guruhi qo‘lga olingan. Ular yetkazgan umumiy ziyon 900 mln rublga yaqinni tashkil qilgan.
