21:59 / 24.10.2019
0
12475

Samarqanddagi parrandachilik fermasidagi yong‘inda 8 ming boshga yaqin jo‘ja nobud bo‘ldi

23 oktabr kuni Samarqand viloyati Pastdarg‘om tumanidagi parrandachilik fermasida yong‘in sodir bo‘layotgani haqida yong‘in-qutqaruv qismiga xabar kelib tushgan.

Yong‘in Dimishqibola mahallasida joylashgan “Darg‘om Parranda Fayz” MChJga tegishli parrandachilik fermasida kelib chiqqan.

«Xabar asosida voqea joyiga 4 ta yong‘in o‘chirish bo‘linmalari jalb etilgan. Bo‘linmalar chaqirilgan manzilga 16 daqiqada yetib borgan (eng yaqin yong‘in-qutqaruv qismigacha masofa 16 km). Yong‘in soat 19:50 da o‘rab olinib, soat 21:50 da bartaraf etilgan», - deyiladi O‘zbekiston Respublikasi FVV YoXBB OAV bilan hamkorlik qilish bo‘linmasi xabarida.

Yong‘in oqibatida 8000 taga yaqin jo‘jalar nobud bo‘lgan va parrandachilik fermasining 150 kv. metr maydonda tomi, shifti yonib zararlangan. Tan jarohati olgan va halok bo‘lgan insonlar qayd etilmagan. 

Yong‘indan fabrikaning 550 kv. metr maydoni hamda 16 ming boshdan ortiq jo‘jalar saqlab qolingan. 

«Yong‘inning taxminiy sababi qo‘lbola isitish moslamasidan foydalanish. Moddiy zarar miqdori aniqlanmoqda», - deyiladi xabarda.

Ushbu xabarga fikringizni bildiring. Buning uchun avtorizatsiyadan oʻtishingiz kerak!
Top