11:31 / 15.11.2019
0
14614

Andijonda pichoqbozlik bilan boshlangan janjal o‘lim bilan yakunlandi

Ikki do‘stning o‘zaro janjali vaqtida pichoq bilan yetkazilgan jarohat oqibatida ulardan biri vafot etdi.

O‘zbekiston Respublikasi IIV huzuridagi Tergov departamenti xabariga ko‘ra, 2019 yilning 13 noyabr kuni taxminan soat 02:00da fuqaro 24 yoshli A.I. do‘sti 19 yoshli X.G. bilan Andijon viloyati Asaka tumani Xonaqa mahallasi Qashqar ko‘chasida o‘zaro janjallashib, yonidagi pichoq bilan X.G.ning badaniga bir marotaba urib, unga tan jarohati yetkazgan.

Fuqaro X.G. olgan tan jarohati oqibatida tibbiy yordam ko‘rsatilishiga qaramasdan shifoxonada vafot etgan.

Tergov tezkor guruhi tomonidan hodisa joyini ko‘zdan kechirish jarayonida qon dog‘lari va X.G.ning kiyimlari hamda bir dona pichoq hujjatlashtirib olingan.

Mazkur holat yuzasidan 2019 yilning 13 noyabr kuni Asaka tumani IIB huzuridagi tergov bo‘limi tomonidan O‘zbekiston Respublikasi Jinoyat kodeksining 104-moddasi 3-qismi «d» bandi (odam o‘lishiga sabab bo‘lgan qasddan badanga og‘ir shikast yetkazish) bilan jinoyat ishi qo‘zg‘atilib, A.I. protsessual tartibda ushlangan hamda holat yuzasidan gumon qilinuvchi tariqasida so‘roq qilingan.

Hozirda ushbu jinoyat ishi bo‘yicha tergov harakatlari olib borilmoqda.

Mavzuga oid
Ushbu xabarga fikringizni bildiring. Buning uchun avtorizatsiyadan oʻtishingiz kerak!
Top