Texnologiya kichik hududlarga mo‘ljallangan bo‘lib, transport xarajatini talab etmaydi, atrof-muhitga zararli moddalarni chiqarmaydi
Toshkent shahar hokimligida Singapurning Alpha Global Capital (S) Pte. Ltd. kompaniyasi mutasaddilari bilan uchrashuv bo‘lib o‘tdi.
Poytaxt hokimligi xabariga ko‘ra, muloqot davomida chiqindilarni qayta ishlash yo‘nalishidagi ishlarni yangi bosqichga olib chiqish masalasi muhokama etildi.
Singapur kompaniyasi vakillari bu yo‘nalishda yetarli tajribaga egaligi, ularning bu soha uchun yaratgan texnika va texnologiyalariga dunyoda qiziqish ortib borayotganligini qayd etdi.
Bugungi kunda kompaniya qattiq va aralash turdagi chiqindilarni qayta ishlash natijasida ekologik toza o‘g‘itlar ishlab chiqarish, qurilish materiallarini tayyorlash, shuningdek, suvni zararsizlantirish uchun qator texnologiyalarni ishlab chiqqan.
Alpha Global Capital (S) Pte. Ltd. taklif etayotgan texnologiyalar kichik hududlarga mo‘ljallangan bo‘lib, transport xarajatini talab etmaydi, atrof-muhitga zararli moddalarni chiqarmaydi, shuningdek, energiya tejamkordir. Suvni zararsizlantirish bo‘yicha takliflari kanallarning sanitar holatini yaxshilash va obodonlashtirish uchun foydali, deyiladi ma'lumotda.
