Qoraqalpog‘istonda bir fuqaro ikkinchisining bosh qismiga ketmon bilan urib tan jarohati yetkazdi
2020 yilning 25 fevral kuni taxminan soat 11:00larda Qoraqalpog‘iston Respublikasi Beruniy tumanidagi “Tinchlik” ovulida 28 yoshli G.B. va uning qaynonasi 56 yoshli G.Sh. qo‘shnisi 36 yoshli X.D. bilan o‘zaro bir-birlarini haqorat qilib janjallashgan.
O‘zbekiston Respublikasi IIV huzuridagi Tergov departamenti xabariga ko‘ra, janjal vaqtida X.D.ning eri 39 yoshli I.S. xotinining yonini olish maqsadida, qo‘shnisi G.B.ning bosh qismiga ketmon bilan urib unga tan jarohati yetkazgan, natijada G.B. shifoxonaga murojaat qilgan.
Mazkur holat yuzasidan Beruniy tumani IIB huzuridagi Tergov bo‘limi tomonidan O‘zbekiston Respublikasi Jinoyat kodeksining 104-moddasi 1-qismi (qasddan badanga og‘ir shikast yetkazish) bilan jinoyat ishi qo‘zg‘atilgan.
Hozirda dastlabki tergov harakatlari davom ettirilmoqda.
