Abdulaziz Komilov O‘zbekiston tomoni xalqaro hamjamiyatning Afg‘onistondagi tinchlik jarayonini ilgari surish bo‘yicha faol harakatlarini qo‘llab-quvvatlashini qayd etdi.
2020 yil 30 iyun kuni O‘zbekiston tashqi ishlar vaziri Abdulaziz Komilov «Markaziy Osiyo – AQSh» (C5+1) videokonferensiyasida ishtirok etdi.
TIV xabariga ko‘ra, tadbirda, shuningdek, Qirg‘iziston tashqi ishlar vaziri Chingiz Aydarbekov, Qozog‘iston tashqi ishlar vaziri Muxtar Tleuberdi, Tojikiston tashqi ishlar vaziri Sirojiddin Muhriddin, Turkmaniston tashqi ishlar vaziri Rashid Meredov va AQSh davlat kotibi Maykl Pompeo ishtirok etdi.
Tomonlar mintaqaviy iqtisodiy hamkorlikni mustahkamlash, zamonaviy tahdid va xatarlarga, jumladan, koronavirus tarqalishiga qarshi kurashning dolzarb masalalarini muhokama qildilar.
COVID-19 pandemiyasi sharoitida global o‘zgarishlarni inobatga olgan holda, O‘zbekiston TIV rahbari raqamli iqtisodiyotni rivojlantirish, milliy transport strategiyalarini muvofiqlashtirish, qishloq xo‘jaligida innovatsiyalarni rag‘batlantirish, mintaqa mamlakatlarining energetika salohiyatini kengaytirish, Markaziy Osiyoning ekologik og‘ir mintaqalarida ijtimoiy-iqtisodiy ahvolni yaxshilash, xususan Orolbo‘yini innovatsiyalar va texnologiyalar hududiga aylantirish bo‘yicha sa'y-harakatlarni faollashtirish kabi yo‘nalishlardagi hamkorlikka urg‘u berishni taklif qildi.
Abdulaziz Komilov O‘zbekiston tomoni xalqaro hamjamiyatning Afg‘onistondagi tinchlik jarayonini ilgari surish bo‘yicha faol harakatlarini qo‘llab-quvvatlashini qayd etdi.
Tashqi siyosat idoralari rahbarlarining nutqlarida C5+1 shakli Markaziy Osiyoda tinchlik, barqarorlik va taraqqiyotni ilgari surish platformasi sifatida o‘zining ahamiyati va dolzarbligini namoyish etishda davom etayotganligi tasdiqlandi.
