23:55 / 20.08.2020
9093

Xalqaro koinot stansiyasida havoning tashqariga sizib chiqishi qayd etildi

Xalqaro koinot stansiyasida havoning tashqariga sizib chiqishi tufayli butun ekipaj stansiyaning Rossiyaga qarashli segmentidagi “Zvezda” moduliga 3 kunga ko‘chib o‘tadi. 

XKS Foto: NASA

Ta'kidlanishicha, XKSning Rossiyaga tegishli segmentida havoning tashqariga sizib chiqayotgani qayd etilgan. Stansiyaning AQShga qarashli segmentida bosim nazorati o‘tkaziladi. Ayni vaqtda ekipaj havo sizib chiqishini cheklash bo‘yicha ishlar olib bormoqda. Bosim aynan qayerda tushib ketayotganini aniqlash uchun stansiyaning modullari birin-ketin yopib tekshiriladi.  

Mutaxassislarning fikricha, sizib chiqishga stansiya korpusiga mikrometeorit yoki fazoviy chiqindi bo‘lagi tegishi olib kelgan bo‘lishi mumkin. 

Stansiyada ayni vaqtda rossiyalik fazogirlar Anatoliy Ivanishin va Ivan Vagner hamda AQSh astronavti Kristofer Kessidi ish olib bormoqda. Ta'kidlanishicha, hozircha ularning hayotiga xavf yo‘q. 

XKSda avval shunday holat 2018 yil 30 avgustda qayd qilingan. O‘shanda stansiyada bosim tushib ketgan. Keyinroq bu stansiyaga birikkan “Soyuz MS-09” kemasidagi havo sizishi sababli yuz bergani aniqlangan. Havo kemaning maishiy bo‘lmasidagi teshikdan chiqib ketayotgani aniqlangan va u germetik bilan yopib qo‘yilgan. Bir necha kundan keyin esa Yerdagi mutaxassislar kema korpusi ichki tomondan parmalangani haqidagi to‘xtamga kelishgan. Buning sababi hanuzgacha noma'lumligicha qolmoqda.

Mavzuga oid
Top