Qayd etilishicha, Donald Tramp qayta saylanish bo‘yicha kampaniya uchun pul yig‘ish va sarflashni prezidentlik lavozimini egallashi bilanoq boshlagan.
AQSh prezidenti Donald Trampning saylovoldi shtabi, Respublikachilar partiyasi va ular bilan bog‘liq yana ikki qo‘mita amaldagi davlat rahbarini qayta saylash uchun 2017 yildan buyon 1 mlrd dollardan ortiq mablag‘ sarfladi. Bu haqda The Washington Post gazetasi yozmoqda.
Nashrning qayd etishicha, Tramp qayta saylanish bo‘yicha kampaniya uchun pul yig‘ish va sarflashni prezidentlik lavozimini egallashi bilanoq boshlagan. Saylovoldi kampaniyasi uchun 1 mlrd dollar mablag‘ sarflangani rekord summa hisoblanadi.
Tramp iyulda kampaniya uchun 165 mln dollar yig‘a olgan, demokratlardan AQSh prezidentligiga nomzod Jozef Bayden esa 140 mln dollar to‘plagan. Avgust oyida amaldagi prezident o‘z kampaniyasini yuritish uchun 300 mln dollarga, uning raqibi esa 294 mln dollarga ega bo‘lgan.
Respublikachilar partiyasi milliy qo‘mitasi avgustda partiya xarajatlari uchun 55,3 mln dollar yig‘a olgan, demokratlar esa 16,3 mln dollar yig‘ishgan.
AQShda prezident saylovi 3 noyabrda bo‘lib o‘tadi.
