09:10 / 06.10.2020
13855

Qirg‘izistonda saylovlar natijalari bekor qilinishi mumkin

Qirg‘iziston prezidenti Sooronbay Jeenbekov parlament saylovlari natijalari bekor qilinishi mumkinligiga yo‘l qo‘ydi.

Jeenbekovning matbuot kotibi Tolgonay Stamaliyevaning ta'kidlashicha, prezident yuzaga kelgan vaziyatni hisobga olib, Markaziy saylov komissiyasiga saylovlarda yo‘l qo‘yilgan qoidabuzarliklar bilan bog‘liq materiallarni batafsil o‘rganib chiqishni va lozim topsa, saylovlar natijalarini bekor qilishni tavsiya qilgan.

Stamaliyevaning aytishicha, Jeenbekov Bishkekda qolmoqda va vaziyatni nazorat qilmoqda. 

Bu orada Qirg‘iziston bosh prokurori deb e'lon qilingan va ushbu lavozimni vaqtinchalik bajarayotgan Almambet Shikmamatov 24.kg nashriga parlament saylovlari natijalari bekor qilinganini ma'lum qildi. 

Uning ta'kidlashicha, saylovlar natijalarining bekor qilinishi muxolifatning bosh talabi bo‘lgan va u bajarildi. Shu bilan birga u yangi saylovlar qachon o‘tkazilishini ayta olmagan.

Avvalroq Qirg‘izistonda saylovlar natijalarini soxtalashtirishga aloqador barchani hibsga olishga sanksiyalar berilgani ma'lum qilingan.

Mavzu
Qirg‘izistonda hukumat almashinuvi
Qirg‘izistonda parlament saylovlari natijalaridan norozi bo‘lgan muxolif partiyalar inqilob amalga oshirishdi.
Barchasi
Mavzuga oid
Top