Belarusda NEXTA Telegram-kanali asoschilari deb hisoblanayotgan Stepan Putilo va Roman Protasevich qidiruvga berildi. Ular Jinoyat kodeksining uchta moddasi bo‘yicha gumonlanmoqda.
Belarus Tergov qo‘mitasi ma'lumotiga ko‘ra, ular «Ommaviy tartibsizliklarni tashkillashtirish», «Jamoat tartibini qo‘pol ravishda buzadigan guruh harakatlarini tashkil etish» va «Kasbiy mansubligi asosida ijtimoiy adovatni qo‘zg‘atishga qaratilgan qasddan qilingan xatti-harakatlar» moddalari asosida gumonlanmoqda.
NEXTA – Belarusda oppozitsion ruhda ekani bilan mashhur bo‘lgan Telegram-kanali hisoblandi. U prezident saylovlaridan so‘ng boshlangan norozilik namoyishlarini faol ravishda yoritib bormoqda va fuqarolarni namoyishlarga chaqirmoqda.
Polyak OAV xabarlariga ko‘ra, kanal asoschisi Stepan Putilo bir necha yil oldin Belarusdan Polshaga ko‘chib o‘tgan.
Putilo Rossiyada ham qidiruvdagi shaxs sifatida Ichki ishlar vazirligining ma'lumotlar bazasiga kiritilgan.
