12:24 / 11.11.2020
3480

Abdulaziz Komilov Afg‘oniston Oliy milliy yarashuv kengashi rahbari bilan muzokara o‘tkazdi

2020 yilning 11 noyabr kuni O‘zbekiston Tashqi ishlar vaziri Abdulaziz Komilovning Afg‘oniston Oliy milliy yarashuv kengashi raisi Abdulla Abdulla bilan uchrashuvi bo‘lib o‘tdi.

O‘zbekiston Tashqi ishlar vazirligi xabariga ko‘ra, suhbat chog‘ida turli sohalardagi ko‘p qirrali O‘zbekiston-Afg‘oniston munosabatlari holati va ularni yanada faollashtirish istiqbollari muhokama qilindi.

Afg‘onistonda mustahkam tinchlik o‘rnatish hamda mintaqaviy xavfsizlikni ta'minlashning muhim jihatlari yuzasidan fikr almashildi.

Transport, logistika, energetika, savdo va ta'lim sohalarida investitsiya va infratuzilma loyihalarini birgalikda amalga oshirish orqali ikki mamlakat o‘rtasidagi savdo-iqtisodiy hamkorlikni chuqurlashtirish masalalariga alohida e'tibor qaratildi.

Afg‘onistonda tez orada tinchlik va barqarorlikka erishish uchun mazkur mamlakatni Markaziy Osiyodagi integratsiya jarayonlariga jalb qilishni jadallashtirishning muhimligi qayd etildi.

Muzokaralarda ikki tomon kun tartibining o‘zaro manfaatli boshqa masalalari ham ko‘rib chiqildi, deyiladi xabarda.

Top