Jo Baydenning AQSh prezidenti sifatidagi inauguratsiyasi koronavirus pandemiyasi sababli virtual tarzda o‘tkaziladi. Bu haqda CNN telekanaliga kongressmen Jyeyms Klaybern ma'lum qildi.
Klaybern 2021 yil 20 yanvarda inauguratsiyani tashkillashtiradigan qo‘mita raislaridan biri etib tayinlandi. Uning ta'kidlashicha, tadbir Demokratik partiyaning avgustda Miluoki shahrida o‘tgan saylovoldi qurultoyi kabi formatda o‘tadi.
“Fikrimcha, prezident qasamyodni an'anaviy ravishda keltiradi, biroq bu safar inauguratsiyaning 75-80 foizi virtual tarzda o‘tadi”, deb ta'kidlab o‘tgan Klaybern.
Bayden o‘tgan hafta inauguratsiya marosimini o‘tkazishda koronavirusga qarshi choralarga alohida e'tibor qaratish lozimligini aytgandi.
Shuningdek, Bayden Vashingtonga uyi joylashgan Uilmington shahridan poyezdda kelishi imkoniyati ko‘rib chiqilayotgani ma'lum qilingan. Oq uyning saylangan prezidenti Delaver shtatidan senator bo‘lganda ishiga aynan shu tarzda qatnagan.
