«Urganch» texnoparki joriy yil may oyida foydalanishga topshirilgan edi.
O‘zbekiston prezidenti Shavkat Mirziyoyev Xorazm viloyatiga tashrifi doirasida Urganch shahridagi texnoparkda bo‘ldi.
Prezident matbuot xizmatining xabar berishicha, hududlardagi «o‘sish nuqtalari»ni ishga solish, tadbirkorlar uchun qulay sharoitlar yaratish maqsadida barcha shahar va tumanlarda kichik sanoat zonalari, texnoparklar tashkil etilmoqda.
«Urganch» texnoparki joriy yil may oyida foydalanishga topshirilgan edi. Qisqa vaqtda bu yerda ikkita korxona faoliyat boshladi. Ular kiyim-kechak ishlab chiqaruvchi «Oq oltin mega tekstil» hamda metalldan turli mahsulotlar tayyorlaydigan «Great Khorezm” shirkatlaridir.
Prezidentimiz tekstil korxonasi mahsulotlarini ko‘zdan kechirdi.
Mazkur shirkatga Germaniya, Italiya, Turkiya kabi davlatlardan keltirilgan tikuvchilik dastgohlari o‘rnatilgan. Bolalar va kattalar kiyimlari, jinsi shim kabi 100 dan ortiq turdagi mahsulotlar ishlab chiqarilib, 75 foizi eksportga yo‘naltirilmoqda», deyiladi xabarda.
Ma'lumot berilishicha, korxonada Urganch va Xiva shaharlari, Yangiariq, Xonqa va Urganch tumanlaridan 400 nafar xotin-qiz mehnat qilmoqda.
Shavkat Mirziyoyev ular bilan suhbatlashdi.
- Sizlarni ko‘rganimdan, mana shunday hunar egallab, o‘zlaringga yoqqan fabrikada ishlayotganlaringdan xursandman. Odamlarni, ayniqsa, ayollar va yoshlarni ish bilan ta'minlash bo‘yicha katta harakatlar qilyapmiz. Bugun-erta Xorazmda yurib, mablag‘lar berib, rejalar tuzishdan maqsad ham shu, - dedi O‘zbekiston prezidenti
Prezident uyda o‘tirgan ayollarni kasanachilik asosida ham ishga jalb etish muhimligini ta'kidladi.
Bugungi kunda texnoparkning qolgan bloklariga ham uskunalar olib kelinmoqda. Majmua to‘liq ishga tushgach, yiliga qariyb 87 milliard so‘mlik mahsulot ishlab chiqarilishi, 5,8 million dollarlik mahsulot eksport qilinishi mo‘ljallangan.
Shu yerda Xiva shahri va Gurlan tumani misolida infratuzilmani yaxshilab, turizm va tadbirkorlikni rivojlantirish, aholi bandligini ta'minlash, kambag‘allikni qisqartirish loyihalari muhokama qilindi.
