Ijtimoiy tarmoqlarda 3 yil avval vafot etgan fuqaroga YHXB tomonidan jarima belgilangani to‘g‘risida xabarlar tarqaldi.
IIV YHXBB axborot xizmati ma'lumotiga ko‘ra, joriy yilning 29 iyun kuni Sirdaryo viloyati Mirzaobod tumani hududida haydovchi, 1954 yilda tug‘ilgan J.S. o‘ziga tegishli bo‘lgan "Matiz" rusumli avtomobilda yo‘l harakati qoidalarining 9-bandida belgilangan talabni buzgan holda, harakat vaqtida xavfsizlik kamarini taqmasdan harakatlangan.
Qayd etilishicha, haydovchi tuman IIB YHXB YPX xodimi S.Abdunabiyev tomonidan to‘xtatilgan va unga nisbatan qoidabuzarligi yuzasidan ma'muriy bayonnoma rasmiylashtirilgan.
Tuman IIB YHXB ma'muriy amaliyot xodimi tomonidan fuqaro J.S.ga nisbatan tuzilgan bayonnoma KAAT markazlashgan dasturiga kiritilishi vaqtida ushbu fuqaro bilan ism-familiya va tug‘ilgan yili bir xil bo‘lgan, Samarqand viloyatida yashagan, 1954 yilda tug‘ilgan J.S.ning ro‘yxatda turgan manzili bo‘yicha jazo qo‘llash to‘g‘risidagi jarima qarori chiqarilgan.
Ma'lum qilinishicha, Samarqand viloyatida ro‘yxatda turgan, 1954 yilda tug‘ilgan J.S.ga nisbatan chiqarilgan qaror belgilangan tartibda bekor qilingan.
IIV YHXBB yo‘l qo‘yilgan kamchiliklar uchun uzr so‘ragan.
