Toshkent shahrida rossiyalik fuqaroga uy olib berishni va'da qilib, uning 52 mln so‘m pulini olib, aldab ketgan shaxs aniqlandi. Bu haqda Tergov departamenti xabar bermoqda.
Aniqlanishicha, joriy yilning 25 aprel kuni Rossiya Federatsiyasi fuqarosi 77 yoshli F.Rufina Yakkasaroy tumani bo‘yicha IIO FMBga ariza bilan murojaat qilib, unda 2020 yilning iyun oyida tanishi 40 yoshli Alisher S. Toshkent shahar hokimiyati orqali uy sotib olishida yordam berishini va'da qilib, Yakkasaroy tumani Sh.Rustaveli ko‘chasi 62-uy oldida 52 mln so‘m pullarini aldov yo‘li bilan qo‘lga kiritib, bergan va'dasini bajarmaganligini ma'lum qilgan.
Mazkur holat yuzasidan Yakkasaroy tumani bo‘yicha IIO FMB huzuridagi Tergov bo‘limi tomonidan Alisher S.ga nisbatan Jinoyat kodeksining 168-moddasi 2-qismi “a” bandi (firibgarlik) bilan jinoyat ishi qo‘zg‘atilgan.
Hozirda tergov harakatlari olib borilmoqda.
