21:06 / 21.05.2021
25685

“Men sehrgar emasman, internetni tezlashtirib yuborolmayman” - bosh vazir maslahatchisi

Olimjon Umarovning ma'lum qilishicha, 1 iyundan boshlab aloqa operatorlari uchun internet narxi o‘zgaradi, narxlar yana 15 foizga pasayadi. 2021 yilda O‘zbekiston bo‘ylab 50 ming km kabel tortish rejalashtirilgan.

Foto: Xalqaro press klub

“Toshkent 5 tashabbus harakati” festivali doirasida yoshlarning AKT yo‘nalishi vakillari bilan uchrashuvi bo‘lib o‘tdi. Bosh vazir maslahatchisi Olimjon Umarov O‘zbekistonda internet tezligi pastligi masalasiga to‘xtalib o‘tdi.

“Men sehrgar emasman, internet tezligini oshirib yuborolmayman. Biroq bu borada ishlar olib borilmoqda, qiladigan ishlar bor hali. So‘nggi bir necha yil ichida internet narxi arzonlashgan. Sun'iy yo‘ldosh orqali internet aloqa qimmat va stabil emas. Eng barqaror internet optik tolali aloqa orqali bo‘ladi”, – dedi u.

Olimjon Umarovning ma'lum qilishicha, 2015 yilda butun respublika bo‘ylab 2 ming kilometr uzunlikdagi optik tolali kabellar tortilgan. Joriy yil 50 ming km kabel tortish rejalashtirilgan.

“1 iyundan boshlab aloqa operatorlari uchun internet narxi o‘zgaradi, narxlar yana 15 foizga pasayadi. Yana bir muhim jihat. Ilgari “tezlik 4 mbgacha” deb yozishardi. Endi o‘sha “gacha” degan joyi bo‘lmaydi. Agar siz internet uchun 100 ming so‘m to‘lasangiz, siz xizmatlarning butun hajmi uchun to‘lagan bo‘lasiz. Agar sekundiga 10 mb yozilgan bo‘lsa, demak, xuddi shuncha tezlik bo‘lishi kerak”, – dedi bosh vazir maslahatchisi.

Eslatib o‘tamiz, 2018 yilda Axborot texnologiyalari va kommunikatsiyalarini rivojlantirish vazirligi hamda «O‘zbektelekom» AK tomonidan tashkil etilgan hisobot anjumanida ham endilikda tarif rejalarida «gacha» qo‘shimchasi bo‘lmasligi aytilgandi.

Top