Abdulaziz Komilovning so‘zlariga ko‘ra, O‘zbekiston afg‘onistonlik qochqinlarni qabul qilish uchun maxsus joylar tashkil etishni rejalashtirmayapti, chunki bunga zarurat yo‘q.
O‘zbekiston tashqi ishlar vaziri Abdulaziz Komilov toliblar hukumatini tan olish masalasi kun tartibida turgani, ammo ular Afg‘onistonda terrorizmga qarshi kurashish to‘g‘risidagi va'dalarini bajarishlari kerakligini aytdi.
“Toliblar hukumatini tan olish masalasi, albatta, kun tartibida turibdi. Biz ittifoqchilarimiz, hamkorlarimiz bilan hamkorlikda bu yo‘nalishda harakat qilamiz. Ammo toliblar oldiga qo‘yilgan shartlar shunchalik jiddiyki, ularga separat ma'noda reaksiya bildirish juda xavfli. Terrorchilik faoliyatining saqlanib qolishi yoki toliblar tomonidan unga qarshi yetarlicha kurash olib borilmasligiga ko‘z yumish <...> - va ularni tan ololmaymiz”, – dedi u rossiyalik jurnalistlarga bergan intervyusida.
Komilovning so‘zlariga ko‘ra, O‘zbekiston afg‘onistonlik qochqinlarni qabul qilish uchun maxsus joylar tashkil etishni rejalashtirmayapti, chunki bunga zarurat yo‘q.
“Qochqinlar oqimi yo‘q, umuman qochqinlar yo‘q. Biz boshidayoq qochqinlarni qabul qilmasligimizni bildirganmiz. Qochqinlar uchun maxsus joylar tashkil etilmagan va bo‘lmaydi ham”, – dedi O‘zbekiston tashqi ishlar vaziri.
