Qozog‘iston Milliy xavfsizlik qo‘mitasi sobiq raisining uyi tintuv qilinganida katta miqdorda naqd pul, qimmatbaho soatlar, tilla quymalar va noyob buyumlar aniqlangan. Karim Masimov pora sifatida olgani aytilayotgan 2 mln dollar xorijdan qaytarilgan, ko‘chmas mulklari va avtomobillari xatlangan; yaqinlaridan 5,1 mln dollar musodara qilingan.
Qozog‘iston milliy xavfsizlik qo‘mitasi qo‘mitaning sobiq raisi Karim Masimov ustidan tergov jarayoni bo‘yicha ayrim ma’lumotlarni e’lon qildi.
2016 yilgacha Qozog‘iston bosh vaziri bo‘lgan, 2016–2022 yillarda mamlakat Milliy xavfsizlik qo‘mitasini boshqargan Karim Masimov 2022 yil yanvaridagi namoyishlar fonida davlatga xiyonatda ayblanib qamoqqa olingan edi.
Qo‘mita xabariga ko‘ra, Masimov va boshqa shaxslarga nisbatan davlatga xiyonat, hokimiyatni zo‘rlik bilan egallab olishga tayyorgarlik ko‘rish va mansab vakolatlaridan chetga chiqishda gumon qilinib, jinoyat ishi bo‘yicha tergov davom etmoqda. Tergov davomida Masimovning harakatlarida ko‘plab korrupsiya belgilari ham aniqlangan.
“Mamlakatimiz ishbilarmon doiralari va xorijiy sub’yektlardan ko‘chmas mulk, qimmatbaho sovg‘alar, jumladan, madaniy boyliklarni, katta miqdordagi mablag‘larni noqonuniy ravishda olish holatlari hujjatlashtirilgan. Xususan, Masimov yopiq shartnomalardan biri bo‘yicha MXQ raisi lavozimida xorijiy davlat vakillaridan 2 million AQSh dollari miqdorida pora olgani yuzasidan tergov harakatlari olib borilmoqda. Ushbu mablag‘larning Honkongdan Qozog‘iston Milliy bankiga qaytarilishi ta’minlandi”, deyiladi qo‘mita rasmiy saytida e’lon qilingan bayonotda.
Ta’kidlanishicha, Karim Masimov bosh vazirlik davrida biznes tuzilmalarining biridan poytaxtda joylashgan, qiymati qariyb 2,5 milliard tenge bo‘lgan hashamatli mehmon uyi va yer uchastkasi olgani yuzasidan ham tergov boshlangan.
Qo‘mita ma’lumotiga ko‘ra, sobiq amaldor hibsga olinganidan so‘ng 2022 yil yanvar oyida ushbu mehmon uyidan 17,2 million AQSh dollari miqdorida naqd pul, shuningdek, ko‘plab hashamatli buyumlar – qimmatbaho soatlar, tilla quymalar, noyob buyumlar va boshqa ko‘p narsalar olib qo‘yilgan.
Bundan tashqari, gumondorga tegishli 11 ta qimmatbaho biznes-klass avtomashinasi musodara qilingan.
Shu bilan birga, Karim Masimovning Nur-Sultondagi ikkita hashamatli kvartirasi, Olmaotadagi ikkita kvartira va dala hovli, shuningdek, Borovoye kurortidagi ko‘l bo‘yida joylashgan 1 gektar yer uchastkasiga hibs solingan.
Qo‘mita bayonotida Karim Massimovning yaqinlaridan 5,1 million dollar musodara qilingani, shu bilan birga, Masimov va uning atrofidagilar tomonidan chet elga noqonuniy ravishda olib chiqib ketilgan bundan ham yirikroq mablag‘larni qidirish, hibs solish va Qozog‘istonga qaytarish bo‘yicha ishlar olib borilayotgani ma’lum qilingan. Qayd etilishicha, ayni paytda mazkur faktlar bo‘yicha faol tergov-tezkor tadbirlari o‘tkazilmoqda.
Rasmiy axborotga Karim Masimovdan olib qo‘yilgan hamda musodara qilingan naqd pul va qimmatbaho buyumlarning suratlari ilova qilingan.
